ایرانی صدر ڈاکٹرحسن روحانی نے شام میں امریکی فورسز کی موجودگی کی مذمت کرتے ہوئے کہا ہے کہ شام کے حوالے سے امریکا کی نئی منصوبہ بندی عالمی قوانین کی خلاف ورزی اور شام کی خودمختاری اور خطے کے خلاف سازش ہے۔
ایرانی خبر رساں ادارے کے مطابق ایرانی صدر ڈاکٹرحسن روحانی نے تہران میں 13ویں اسلامی پارلیمانی یونین کانفرنس کے موقع پر شام کے اسپیکرحمودہ یوسف صباغ کے ساتھ ہونے والی ملاقات میں گفتگو کرتے ہوئے کہا کہ ایران ماضی کی طرح دہشتگردوں کے خلاف شامی قوم اور حکومت کی حمایت جاری رکھے گا۔
انھوں نے مزید کہا کہ اس کے ساتھ ہم شام میں قیام امن کے لئے سیاسی عمل کی بھی بھرپور حمایت کرتے ہیں، ایران، شام دیرینہ تعلقات کا حوالہ دیتے ہوئے دونوں ممالک کے درمیان کثیر الجہتی تعلقات کی توسیع پر زور دیتے ہوئے کہا کہ انسداد دہشتگردی اور بیرونی مداخلت کی روک تھام شامی قوم کے لئے اہم ہے۔
ایرانی صدر نے کہا کہ شام میں نقل مکانی کرنے والوں کی واپسی اور ان کو درپیش مسائل کو حل کرنے کی ضرورت ہے۔