امریکی صدر ڈونلڈ ٹرمپ نے کینیڈا کے وزیر اعظم جسٹن ٹروڈو سے ٹیلی فونک رابطہ کیا ہے جس میںدونوں ممالک کی باہمی تجارت سمیت دیگر معاشی معاملات پر گفتگو کی گئی۔
ذرائع کے مطابق دونوں رہنمائوں کی گفتگو میں وزیر اعظم ٹروڈو نے صدر ٹرمپ کو صورت حال سے آگاہ کرتے ہو ئے بتایا کہ ان کی حکومت کے پاس اسٹیل اور المونیم پر عائد نئے امریکی ٹیکسوں کا جواب دینے کے علاوہ کوئی چارہ نہیں تھا۔
وائٹ ہائوس کی ترجمان سارہ سینڈرزنے صدر ٹرمپ اورکینیڈین وزیر اعظم کی ٹیلی فونک گفتگو کے حوالے سے کہا ہے کہ دونوں رہنماؤں کے درمیان تجارت اور معاشی معاملات پر دو طرفہ امور پر بات کی گئی۔
تر جمان کے مطابق دونوں رہنمائوں نے مستقبل میں بھی رابطے جاری رکھنے پر اتفاق کیا۔
واضح رہے کہ جی سیون اجلاس کے بعد دونوں رہنمائوں کے درمیان یہ پہلا باقاعدہ رابطہ ہے جس میں صدر ٹرمپ نے ٹروڈو کو بد دیانت اور کمزور شخص قرار دیا تھا۔