گلوکار علی ظفر نے اپنے تازہ ترین سوشل میڈیا بیان میں گلوکارہ میشا شفیع کو ایک بار پھر عدالت کا سامنا کرنے اور ہتک عزت کے عوض جرمانہ ادا کرنے کا مطالبہ کیا ہے۔
سماجی رابطے کی ویب سائٹ ٹوئٹر پر اپنے بیان میں علی ظفر نے میشا شفیع کے حال ہی میں اپنا ٹوئٹر اکاؤنٹ عارضی طور پر بند کرنے کے عمل کو طنز کا نشانہ بناتے ہوئے کہا ہے کہ ٹوئٹر اکاؤنٹ بند کرنے کے حیلے بہانے نہیں چلیں گے، فرار اختیار کرنے سے کچھ حاصل نہیں ہو گا۔
میشا شفیع نے چند دن قبل ایک ٹوئٹر پیغام میں کہا تھا کہ وہ عارضی طور ٹوئٹر سے بریک لے رہی ہیں کیونکہ نامور ویب شو ’گیم آف تھرونز‘ کی اگلی اقساط سے متعلق سوشل میڈیا پر جاری پیشگی تبصروں کی وجہ سے شو کا مزا کرکرا نہیں کرنا چاہتی۔
میشا نے مزید کہا تھا کہ ان کے بریک لینے کی وجہ یہ ہرگز نہیں کہ میں سوشل میڈیا پر اپنے خلاف چلنے والی مہم کا مقابلہ نہیں کرسکتی، اس کا مقابلہ میں نے گزشتہ برس بھی کیا، ایسا ہرجان لیوا امتحان آپ کو مزید مضبوط بناتا ہے۔