وفاقی وزیر اطلاعات سینیٹر شبلی فراز کا کہنا ہے کہ عالمی مذہبی آزادیوں کے امریکی کمیشن کی رپورٹ نے بھارت کا چہرہ دنیا کے سامنے بے نقاب کر دیا ہے۔
شبلی فراز نے اپنے ایک بیان میں بھارت سے متعلق امریکی کمیشن کی رپورٹ پر بات کرتے ہوئے کہا ہے کہ یہ رپورٹ انتہا پسند ہندو معاشرے کا پتہ دے رہی ہے، نریندر مودی کے ہاتھوں آج بھارتی سماج تقسیم کی گہری کھائی میں گر چکا ہے۔
وزیراطلاعات شبلی فراز نے کہا ہے کہ عالمی تنظیمیں اور بین الاقوامی میڈیا بھارت کی اصلیت دکھا رہا ہے، دنیا بھر میں بھارتی اقدام کی اتنی مذمت پہلے کبھی نہیں دیکھی جتنی آج دیکھی جا رہی ہے اور بھارت میں اقلیتوں کے حقوق روندے جارہے ہیں۔
انہوں نے مزید کہا کہ بھارت میں ہندتوا سوچ کا راج اور اکیسویں صدی کی نازی تنظیم ابھر کرسامنے آرہی ہے۔
شبلی فراز کا کہنا تھا کہ بھارت میں مسلمانوں کے گرد گھیرا ہر روز مزید تنگ ہورہا ہے، ایک طرف جموں وکشمیر میں انہیں کرفیو کے جبر کا سامنا ہے تو دوسری جانب متنازعہ شہریت بل کا۔
شبلی فراز نے کہا ہے کہ متنازعہ شہریت بل کے ذریعے کشمیری مسلمانوں کی زندگی اجیرن بنائی جا رہی ہے، کورونا کو مسلم وائرس قرار دینا بیمار بھارتی ذہنیت کی عکاسی ہے۔