وزیراعظم آزاد کشمیر راجا فاروق حیدر نے برہان وانی شہید کی برسی پر خصوصی پیغام جاری کرتے ہوئے کہا کہ تحریک آزادی کشمیر میں جولائی کی بڑی اہمیت ہے کیونکہ 8 جولائی کشمیر کے بطل حریت برہان وانی کی شہادت کا دن ہے۔
راجا فاروق حیدر نے کہا کہ برہان وانی کی شہادت نے تحریک آزادی کو نیا رخ دیا، مقبوضہ کشمیر کی انفرادیت کو قائم رکھنا سب کی ذمہ داری ہے کیونکہ بھارت مقبوضہ کشمیر میں غیر کشمیریوں کو آباد کرکے کشمیریوں کی شناخت ختم کرنا چاہتا ہے۔
وزیراعظم آزاد کشمیر نے کہا کہ حریت قیادت کو بھارتی فوج نے پابند سلاسل کر رکھا ہے، پورا کشمیر 10 ماہ سے بند ہے۔
اُنہوں نے کہا کہ مہاراجہ کشمیر نے 1927 میں اسٹیٹ سبجیکٹ نافذ کیا تھا کہ جموں اور لداخ والے غیر کشمیریوں کو داخل نہ ہونے دیں۔
راجا فاروق حیدر نے کہا کہ وادی، جموں، لداخ، گلگت بلتستان اور آزاد کشمیر اکائیاں ہیں، ریاست کی شناخت کو قائم رکھنا ہم سب کی ذمہ داری ہے۔
واضح رہے کہ بھارتی فوجیوں نے کشمیری رہنما برہان وانی کو 8 جولائی 2016 کو محاصرے اور تلاشی کی ایک کارروائی کے دوران 2 ساتھیوں کے ہمراہ شہید کر دیا تھا۔