کراچی:گیارہ گھنٹے سے بجلی غائب، عوام پریشان

کراچی میں مون سون کی پہلی بارش کی چند بوندیں پڑتے ہی شہر سے بجلی غائب ہوگئی اور پچھلے گیارہ گھنٹے سے عوام بجلی کی منتظر ہے۔ بعض علاقوں میں بجلی ہے تو وولٹیج پورا نہیں جس کے سبب شہری شدید مشکلات کا شکار ہیں تاہم کے الیکٹرک حکام کا دعویٰ ہے کہ شہر کے تمام فیڈرز بحال کردیئے گئے ہیں۔

کھارادر، لیاری، صدر، اولڈ سٹی ایریا، گلشن اقبال ، گلستان جوہر، نارتھ کراچی، نیو کراچی، نارتھ ناظم آباد، ناظم آباد، ایف بی ایریا، منظور کالونی سمیت 11 سے 12 گھنٹے گزرجانے کے باوجود شہر کے متعدد علاقوں میں بجلی کی فراہمی بحال نہ ہوسکی اور جن علاقوں میں بجلی کی فراہمی بحال ہوئی وہاں ولٹیج کی کمی کا سامنا ہے۔

ترجمان کے الیکٹرک نے دعویٰ کیا ہے کہ بارش کے دوران 200 فیڈرز ٹرپ کرگئے تھےجنہیں آہستہ آہستہ بحال کردیا گیاہے اور اس وقت کراچی میں بارش سے متاثرہ تمام فیڈرز بحال ہیں۔

ترجمان کے الیکٹرک فخر احمد کے مطابق جن علاقوں میں بجلی نہیں ہے وہاں معمول کی ٹرپنگ اور فنی خرابی ہے۔