داعش کیخلاف مخلوط محاذ کا مکمل حصہ بنیں گے،نیٹو سیکریٹری

نیٹو کے سیکٹری جنرل جینز اسٹولٹن برگ نےکہا ہے کہ نیٹو دہشت گردی کے خلاف جنگ میں نہ صرف اپنا بھرپور کردار ادا کرے گا بلکہ داعش کیخلاف مخلوط محاذ کا مکمل رکن بنے گا۔

ان خیالات کا اظہار انہوں نے اب سے کچھ دیر قبل نیٹو ہیڈ کوارٹر برسلز میں نیٹو سربراہ اجلاس کے ایجنڈے سے متعلق ایک پریس کانفرنس سے خطاب کرتے ہوئے کیا ۔

انہوں نے کہا کہ اس موقع پر امریکی صدر ڈونلڈ ٹرمپ کی موجودگی میں نئے ہیڈ کوارٹر کا افتتاح کیا جائے گا ۔انہوں نے مانچسٹر میں دو دن قبل ہونے والی دہشت گردی کی شدید الفاظ میں مذمت کرتے ہوئے کہا کہ یہ کانفرنس اس ساری صورتحال کا جواب ہے ۔

ایک سوال کے جواب میں سیکٹری جنرل نیٹو نے کہا کہ افغانستان میں ابھی بھی مشکلات ہیںلیکن افغان فوج اپنے ملک کا خود دفاع کر رہی ہے ،نیٹو کا صرف تربیتی کردار ہے۔ ہم افغانستان میں تربیت کیلئے مزید 2000 فوجی بھیجیں گے ۔ مسٹرا سٹولٹن برگ نے مزید کہا کہ نیٹو افغانوں کے زیر قیادت امن عمل کا حامی ہے۔