ہیپاٹائٹس ایک موذی مرض ہے جس کا وائرس امراض جگر کا باعث بنتا ہےاور جگر کے کینسر تک میں مبتلا کر دیتا ہے جو انسانی جان لے لیتا ہے تاہم یہ قابل علاج ہے اور اگر احتیاط کی جائے تو اس سے محفوظ رہا جاسکتا ہے۔
ماہر متعدی امراض ڈاکٹر نسیم صلاح الدین نے بتایا کہ انسانی جگر انسان کو کئی طریقوں سے صحت مند رکھتا ہے یہ خون سے ٹاکس نکال دیتا ہے اور غذائی اجزاء کو توانائی میں تبدیل کرتا ہے تاہم ہیپاٹائٹس کا وائرس جگر کو ناکارہ کردیتا ہے۔
ہیپاٹائٹس کی کئی اقسام ہیں جن میں اے، بی، ای اور سی شامل ہیں تاہم سب سے خطرناک ہیپاٹائٹس بی اورسی ہیں جو زیادہ تر استعمال شدہ سرنج، متاثرہ خون لگنے، استعمال شدہ بلیڈ استعمال کرنےاور آپریشن کےمتاثرہ اوزار لگنے سےخون کے ذریعے منتقل ہوتے ہیں۔
انہوں نے بتایا کہ پاکستان دنیا کا واحد ملک ہے جہاں سب سے زیادہ انجیکشن استعمال کیے جاتےہیں جس کی بڑی وجہ عوام کا انجیکشن لگانے پر اصرار کرنا ہے۔