یورپ میں دو برسوں کے دوران 17 حملوں میں 364 ہلاکتیں

اسپین میں جمعرات کی شام ہونے والے دہشت گرد حملے کے نتیجے میں 14 افراد ہلاک اور 120 سے زیادہ زخمی ہو گئے۔اس کارروائی کے ساتھ ہی گزشتہ دو برسوں میں یورپ کے مختلف ممالک میں ہونے والے دہشت گرد حملوں میں اپنی جانوں سے ہاتھ دھونے والے افراد کی مجموعی تعداد 364 ہو چکی ہے جب کہ اس دوران ہزاروں افراد زخمی ہوئے۔

ان کارروائیوں کے سبب متاثرہ ممالک کو بھاری مالی نقصان بھی ہوا اور کئی اہم تاریخی مقامات کو نقصان پہنچا۔میڈیارپورٹس کے مطابق گزشتہ دو برسوں میں براعظم یورپ میں 17 دہشت گرد حملے دیکھنے میں آئے۔

ان حملوں میں 364 افراد کی جان جانے کے علاوہ ہزاروں زخمی ہوئے۔یورپی میڈیا کا کہنا تھا کہ بارسلونا حملے سے پہلے تک یورپ میں ہونے والے 16 حملے کسی طور بھی اپنے مقاصد کے حصول میں کامیاب نہ ہوئے۔

میڈیا کے مطابق ان کارروائیوں کا مقصد لوگوں کو اپنی معمول کی زندگی سے دور کرنا تھا مگر ہر کارروائی کے بعد لوگ دہشت گردی کے خلاف پہلے سے زیادہ پْرعزم طور پر زندگی کی جانب لوٹے۔

جرائم اور دہشت گردی کے حوالے سے یورپی یونین کے 28 ممالک کی مدد کے لیےقائم تنظیم یوروپول کے مطابق برطانوی باشندوں کو کئی دہائیوں سے سب سے زیادہ خطرے کا سامنا ہے۔