روس: 30 انسانوں کو کھانے والا جوڑا گرفتار

26 ستمبر ، 2017

روس میں 30 انسانوں کو کھانے والا آدم خور جوڑا پکڑا گیا، ملزمان نے اعتراف جرم کرتے ہوئے کہا ہے کہ انہوں نے کم ازکم ڈھائی درجن سے زائد لوگوں کو مار کر اپنا نوالہ بنایا ہے۔

غیر ملکی میڈیا کے مطابق روس میں ایک آدم خور جوڑے نے30 افراد کو مار کر کھانے کے ساتھ انسانی اعضا جمع کرنے، ان کے ساتھ تصاویر کھنچوانے کا بھی اعتراف کیا ہے۔

پولیس نے آدم خور خاندان کے گھر سے 8 بڑے انسانی اعضا دریافت کرنے کی تصدیق کی ہے، مزید شواہد کے لیے گھر کا کونا کونا جانچا جا رہا ہے ۔

اس خونی واقعے کا مرکزی ملزم 35 سالہ دیمیتری بکشی یف ہے جس نے اعتراف کیا کہ وہ 1999ء سے انسانوں کو مار کر کھا رہا ہے۔

دمیتری بکشی یف اور اس کی اہلیہ نے فریج اور فریزر کے علاوہ برتنوں اور مرتبانوں میں انسانی گوشت بھی جمع کر رکھا تھا۔

فریج سے انسانی اعضا کی 7 تھیلیاں بھی ملیں جن میں منجمد گوشت موجود تھا، گھر سے مرنے والوں کی جلد کے 19 بڑے ٹکڑے بھی برآمد ہوئے، یہ خاندان جنوبی روس کے علاقے کراسنودارمیں مقیم تھا اور اس کی 42 سالہ اہلیہ نتالیہ ایک نرس ہے جو خود اس جرم میں برابر کی شریک رہی ہے ۔

ان کے مکان کے مختلف حصوں کی تلاش جاری ہے اورپولیس کو یقین ہے کہ مزید انسانی اعضا برآمد ہوسکتے ہیں۔

تازہ ترین