قندھار میں ملٹری بیس پر خودکش حملہ، 41 فوجی ہلاک

افغانستان کےصوبے قندھار میں فوجی بیس پرخودکش بمباروں نے حملہ کر دیا جس کے نتیجے میں 41 فوجی ہلاک اور 20 سے زائد زخمی ہو گئے۔

 افغان میڈیا کے مطابق خودکش بمباروں نے ضلع میوند میں ملٹری بیس کو نشانہ بنایا۔

حملے کے بعد سیکیورٹی فورسز نے علاقے کو گھیرے میں لیکر سرچ آپریشن شروع کردیا ہے جب کہ زخمیوں کو قریبی اسپتال منتقل کیا گیا جہاں بیشتر زخمیوں کی حالت تشویشناک ہونے کے باعث ہلاکتوں میں اضافہ کا خدشہ ہے۔

افغان سیکیورٹی فورسز کے مطابق دہشت گردوں نے پہلے بارود سے بھری گاڑی کو دھماکے سے اڑایا جس کے بعد انہوں نے ملٹری بیس پر فائرنگ شروع کردی، دوسری جانب ملٹری بیس پر خود کش حملے اور فائرنگ کے دوران غیر ملکی افواج فضائی کارروائی میں دہشت گردوں کو نشانا بھی بنایا جس کے نتیجے میں 10 طالبان مارے گئے۔

قندھار پولیس چیف نے حملے کی تصدیق کردی ہے تاہم وزارت دفاع کی جانب سے اس حوالے سے کوئی بیان جاری نہیں کیا گیا جب کہ طالبان نے حملے زمہ داری قبول کرلی ہے۔

واضح رہے کہ رواں ہفتے فوجی تنصیبات پر یہ تیسرا حملہ ہے۔