لاہور ایئر پورٹ پر ایمانداری کی مثال قائم شارجہ سے آنے والے مسافر کو سامان مل گیا

لاہور کے علامہ اقبال انٹرنیشنل ایئرپورٹ پر سول ایوی ایشن اتھارٹی کے عملے نے ایمانداری کی شاندار مثال قائم کی ہے۔ شارجہ سے آنے والے مسافر کا پانچ لاکھ روپے سے زائد مالیت کا گمشدہ سامان اسے لوٹا دیا۔

ایئرپورٹ حکام کے مطابق شارجہ سے لاہور آنے والا مسافر کاشف رزاق پانچ لاکھ روپے سے زائد مالیت کا سونا ایئرپورٹ پارکنگ میں بھول گیا تھا۔

سول ایوی ایشن اتھارٹی کے ملازمین محمد طاہر اور رضوان اسکندر نے سونا مسافر کو واپس کردیا۔ جس پر دونوں ملازمین کو تعریفی سرٹیفکیٹ سے نوازا گیا۔

ڈائریکٹر سیکیورٹی سلمان عزیز کا کہنا تھا کہ پارکنگ میں نصب جدید سیکیورٹی کیمروں کی مدد سے مسافر کا سامان ڈھونڈ کر اس کے حوالے کیا گیا۔

ایئرپورٹ منیجر نذیر چودھری کا کہنا ہے کہ مسافروں کے جان و مال کا تحفظ اولین ذمہ داری ہے۔