کسان کو بچانا ہے تو عمران کو بھگانا ہے، بلاول

پاکستان پیپلزپارٹی کے چیئرمین بلاول بھٹو زرداری نے کسان مارچ کا اعلان کرتے ہوئے کہا ہے کہ کسان کو بچانا ہے تو عمران کو بھگانا ہے۔

حیدرآباد میں ٹریکٹر ٹرالی مارچ سے خطاب کرتے ہوئے بلاول بھٹو زرداری نے کہا کہ فیصلہ کرلیا ہے 27 فروری کو کراچی سے نکلیں گے اور اسلام آباد جائیں گے۔

انہوں نے کہا کہ آئینی و قانونی طریقے سے ان کو نکالیں گے، ان کی حکومت کو ختم کریں گے اور انہیں بے نقاب کریں گے۔

بلاول بھٹو کا کہنا تھا کہ بلدیاتی نظام کو کالا قانون کہنے والوں کا منہ خود کالا ہوجائے گا، جو حکومت کے ساتھی سندھ سے تعلق رکھتے ہیں وہ سندھ کو نقصان پہنچانے کی کوشش کررہے ہیں۔

انہوں نے مزید کہا کہ جو اپنے قائد سے وفا نہیں کرسکتے وہ آپ سے کیا وفا کریں گے، یہ دہشت گردی میں ملوث تھے، یہ آپ کے دشمن ہیں، اس شہر اور صوبے کے دشمن ہیں۔