الیکشن کمیشن نے صوبائی وزیر شاہ محمد کی رکنیت بحال کر دی

10 فروری ، 2022

الیکشن کمیشن نے اسلام آباد ہائیکورٹ کےفیصلےکی روشنی میں خیبر پختونخوا کے وزیر شاہ محمد خان کی رکنیت بطور ممبر صوبائی اسمبلی بحال کر دی ہے۔

شاہ محمد خان پی کے 89 بنوں سے رکن خیبر پختو نخوا اسمبلی ہیں، انہیں بکاخیل میں پولنگ اسٹیشن پرحملے، اغوا اور یرغمال بنانے پرالیکشن کمیشن نے نااہل کیا تھا۔

واضح رہے کہ گزشتہ روز اسلام آباد ہائی کورٹ کےچیف جسٹس اطہر من اللّٰہ نے خیبر پختونخوا کے وزیر شاہ محمد کی نااہلی کا فیصلہ معطل کردیا تھا۔

صوبائی وزیر شاہ محمد اور ان کے بیٹے پی ٹی آئی امیدوار مامون الرشید نے نااہلی چیلنج کی تھی، ان دونوں کو الیکشن کمیشن نے یکم فروری کو نااہل کیا تھا۔

شاہ محمد کی جانب سے دائر درخواست میں الیکشن کمیشن سے نااہلی کا فیصلہ کالعدم قرار دینے کی استدعا کی گئی تھی اور کہا گیا تھا کہ حملہ مخالف امیدوار مامور خان وزیر نے شکست دیکھ کر کیا تھا۔

ان کا درخواست کے متن میں مزید کہنا تھا کہ مامور خان وزیر خود حملہ کر کے الیکشن کمیشن میں متاثرہ فریق بن کر آگئے۔

ہائیکورٹ کااپنے فیصلے میں کہنا تھا کہ صوبائی وزیر شاہ محمد کی حد تک الیکشن کمیشن کا فیصلہ معطل کیا گیا ہے، عدالت نے فریقین کو نوٹسز جاری کرکے سماعت 11 فروری تک ملتوی کردی تھی۔

قومی خبریں سے مزید