ایس آئی یو ٹی میں روبوٹک سرجری سینٹر کا افتتاح

وزیراعلیٰ سندھ مراد علی شاہ نے ایس آئی یو ٹی میں روبوٹک سرجری سینٹر کا افتتاح کردیا ہے۔

اس موقع پر میڈیا سے گفتگو کرتے ہوئے مراد علی شاہ کا کہنا تھا کہ جراحی کی شعبے میں روبوٹک سرجری انقلابی قدم ہے، روبوٹ کے ذریعے باریک اعضاء کی سرجری بھی کرسکتے ہیں، مصنوعی انٹیلیجنس کو چلانے کیلئے بہترین سرجن کا ہونا لازمی ہے۔

انہوں نے مزید کہا کہ حکومت سندھ نے پہلی مرتبہ 2017ء میں روبوٹ سرجری کا سسٹم خریدا تھا، روبوٹک سرجری کا نام دنیا کے مشہور مصور ڈی ونچی سے منسوب ہے، ڈی ونچی کے ہاتھ نفاست کے ساتھ رنگوں سے کھیلتے تھے۔

ان کا یہ بھی کہنا تھا کہ روبوٹ کے ہاتھ انسانی اعضاء کی جراحی نفاست سے کریں گے، اب تک ایس آئی یو ٹی میں ایک ہزار سرجریز ہوچکی ہیں۔

وزیر اعلیٰ سندھ نے کہا کہ روبوٹک سرجری سے جسم میں درد کم ہوتا ہے، خون کم ضائع اور انفیکشن کے امکانات کم ہوتے ہیں۔

وزیر اعلیٰ سندھ نے ڈاکٹر ادیب رضوی اور ٹیم کو روبوٹک سسٹم لگانے پر مبارکباد بھی دی۔