صابر ہاشمی کی درخواستِ ضمانت، FIA سائبر کرائم سے جواب طلب

وزیرِ اعظم عمران خان کے خلاف سوشل میڈیا مہم چلانے کے الزام میں گرفتار ن لیگی کارکن صابر محمود ہاشمی کی درخواستِ ضمانت پر سماعت کے دوران لاہور کی عدالت نے ایف آئی اے سائبر کرائم کو نوٹس جاری کر کے کل جواب طلب کر لیا۔

لاہورکی عدالت کے ایڈیشنل سیشن جج یاسین شاہین نے صابر محمود ہاشمی کی درخواستِ ضمانت پر سماعت کی۔

صابر محمود ہاشمی کے وکیل کی جانب سے دائر کی گئی ضمانت کی درخواست میں مؤقف اختیار کیا گیا ہے کہ مجسٹریٹ نے صابر محمود ہاشمی کو جوڈیشل ریمانڈ پر جیل بھیج دیا ہے۔

مریم نواز نے گرفتار صابر محمود ہاشمی کیلئے وکیل مقرر کر دیا

مسلم لیگ ن کی رہنما، سابق وزیرِ اعظم میاں نواز شریف کی صاحبزادی مریم نواز کا کہنا ہے کہ لیگی کارکن صابر محمود ہاشمی کی گرفتاری کے خلاف ایڈووکیٹ فرہاد شاہ کیس لڑیں گے۔

درخواست میں کہا گیا ہے کہ درج کی گئی ایف آئی آر کے مندرجات کے مطابق صابر محمود ہاشمی نے کوئی جرم نہیں کیا، صابر محمود ہاشمی ن لیگی کارکن ہیں جن کے خلاف جھوٹا کیس بنایا گیا ہے۔

درخواست میں عدالت سے استدعا کی گئی ہے کہ یہ کیس مزید تفتیش کا ہے، اس لیے صابر محمود ہاشمی کو ضمانت پر رہا کیا جائے۔