ابھی کل کا دن باقی ہے، مزید سرپرائزز آئیں گے، فیاض الحسن چوہان

08 اپریل ، 2022

نامزد وزیراعلیٰ پنجاب پرویز الٰہی کے ترجمان فیاض چوہان کا کہنا ہے کہ ابھی کل کا دن باقی ہے، مزید سرپرائزز آئیں گے۔

انہوں نے میڈیا سے گفتگو میں کہا کہ پیر کے روز میں لاہور ہائیکورٹ میں ایک پٹیشن دائر کروں گا، کیا انہوں نے تحریک انصاف کے مینڈیٹ کی خلاف ورزی نہیں کی، الیکشن کمیشن ان ارکان کو ڈی سیٹ کرنے کا پابند ہے۔

فیاض الحسن چوہان نے کہا کہ بیرونی سرمائےسے ہمدردیاں تبدیل کرنیوالوں کیخلاف بھی کارروائی ہوگی، ابھی کل کا دن باقی ہے،مزید سرپرائزز آئیں گے۔

انہوں نے یہ بھی کہا کہ ڈپٹی اسپیکر کیخلاف حمزہ شہباز کیساتھ ملنےکے ثبوت مل چکے تھے، ڈپٹی اسپیکر نے گھر میں بیٹھ کر اسمبلی اجلاس بلانے کا آرڈر جاری کردیا۔

فیاض چوہان نے کہا کہ پیر کے روز لاہور ہائیکورٹ میں سماعت کے دوران یہ باتیں ہوں گی، منحرف ارکان کے خلاف ریفرنس تیار ہیں، آج یا کل ریفرنس اسپیکر آفس سے الیکشن کمشن بجھوا دئیےجائیں گے، پارٹی فیصلےکےخلاف منحرف ارکان کا جانا ثابت ہوچکا ہے۔