ن لیگ 28 دن انتظار کرلیتی تو آئینی بحران نہ ہوتا: پرویز الہٰی

30 اپریل ، 2022

اسپیکر پنجاب اسمبلی چوہدری پرویز الہٰی کا کہنا ہے کہ پنجاب میں آئینی بحران آ چکا ہے، اگر ن لیگ والے 28 دن انتظار کرلیتے تو آئینی بحران نہ ہوتا۔

میڈیا سے گفتگو کرتے ہوئے اسپیکر پنجاب اسمبلی چوہدری پرویز الہٰی نے کہا کہ کچھ دنوں کے بعد خبر کچھ اور ہو گی۔

انہوں نے کہا کہ وزارتِ اعلیٰ کا امیدوار تو میں تھا، حمزہ شہباز وزیرِ اعلیٰ نہیں ہیں، حمزہ شہباز کے کہنے پر مجھ پر تشدد کیا گیا جس سے میں بے ہوش ہو گیا۔

پرویز الہٰی نے کہا کہ وزیرِ اعلیٰ کا الیکشن متنازع نہیں بلکہ الیکشن ہوا ہی نہیں، اسمبلی کی کارروائی کو روکا گیا، جہاں ووٹ کاسٹ کرنے تھے وہاں پولیس آ گئی تھی۔

ان کا مزید کہنا ہے کہ پولیس جوتے پہن کر ہاؤس میں داخل ہوئی، ایوان ہمارے لیے مقدس ہے، گورنر وفاق کا نمائندہ ہے، ان کے ساتھ جو کیا گیا اس پر صدر خاموش نہیں رہیں گے۔

اسپیکر پنجاب اسمبلی چوہدری پرویز الہٰی کا یہ بھی کہنا ہے کہ رات کو چیف سیکریٹری اور آئی جی نے گورنر ہاؤس پر قبضہ کیا، یہ معاملہ خود دیکھوں گا۔

قومی خبریں سے مزید