عمران نے معافی نہ مانگی تو قانون حرکت میں آنا چاہیے، احسن اقبال

وفاقی وزیر برائے منصوبہ بندی احسن اقبال نے مریم نواز سے متعلق عمران خان کے بیان کی مذمت کرتے ہوئے کہا کہ انہوں نے اگر معافی نہیں مانگی تو قانون کو حرکت میں آنا چاہیے۔

اپنے بیان میں احسن اقبال نے کہا کہ عمران نیازی مریم نواز کے خلاف اپنی بدزبانی سے شائستگی، اقدار اور برداشت کی تمام حدیں عبور کر چکا ہے۔

مریم نواز! میرا نام نہ لیا کرو کہیں تمہارا خاوند ہی ناراض نہ ہوجائے، عمران خان

عمران خان نے کہا کہ مریم اتنے جذبے اور جنون سے میرا نام نہ لیا کرو کہیں تمہارا خاوند ہی ناراض نہ ہوجائے۔

احسن اقبال نے کہا کہ یہ عمران کی ذہنی پستی اور بے غیرتی کی عکاس ہے اور ناقابل برداشت ہے۔

انہوں نے مزید کہا کہ عمران نیازی نے پاکستان کی ہر بیٹی کی توہین کی ہے، اگر معافی نہیں مانگی تو قانون کو حرکت میں آنا چاہیے، بہت ہوگیا!

واضح رہے کہ پاکستان تحریک انصاف (پی ٹی آئی) کے چیئرمین اور سابق وزیر اعظم عمران خان نے ن لیگ کی نائب صدر مریم نواز سے متعلق نازیبا کلمات کہے تھے۔

ملتان میں جلسے سے خطاب کرتے ہوئے چیئرمین پی ٹی آئی نے مریم نواز کی گزشتہ روز کی تقریر کا ذکر کرتے ہوئے کہا ہے کہ مریم اتنے جذبے اور جنون سے میرا نام نہ لیا کرو کہیں تمہارا خاوند ہی ناراض نہ ہوجائے۔