امریکا کا یوکرین کو مسلح ڈرونز دینے کا ارادہ

02 جون ، 2022

امریکا کا یوکرین کو جدید راکٹ سسٹم کے بعد اب مسلح ڈرونز دینے کا بھی ارادہ ہے۔

بین الااقوامی میڈیا کی رپورٹ کے مطابق، بائیڈن انتظامیہ یوکرین کو چار MQ-1C گرے ایگل ڈرون فروخت کرنے کا ارادہ رکھتی ہے جو روس کے خلاف میدان جنگ میں استعمال کے لیے ہیل فائر میزائلوں سے لیس ہو سکتے ہیں۔

اس حوالے سے ایک ڈرون کے ماہر ڈین گیٹنگر کا کہنا ہے کہ ’عام طور پر MQ-1C ایک بہت بڑا طیارہ ہے جس کا ٹیک آف وزن Bayraktar-TB2 سے تین گنا زیادہ ہے، جس میں پے لوڈ کی گنجائش، رینج اور برداشت میں ہم آہنگ ہونے کے فوائد بھی موجود ہیں۔‘

رپورٹ میں یہ بھی بتایا گیا ہے کہ جنرل اٹامکس سے بنے ڈرونز کی یوکرین کو فروخت امریکی کانگریس اب بھی روک سکتی ہے، اور آخری لمحات میں اس پالیسی کے مسترد ہوجانے کا خطرہ بھی ہے جو کہ اس منصوبے کو ناکام بنا سکتا ہے۔

خیال رہے کہ گزشتہ روز امریکی صدر جوبائیڈن نے یوکرین کو جدید راکٹ سسٹم بھیجنے کا اعلان کیا ہے۔

امریکی میڈیا کے مطابق، صدرجوبائیڈن یوکرین کو خود مختار، آزاد، خوشحال اور دفاعی صلاحیت سے لیس دیکھنا چاہتے ہیں۔

امریکی صدر کا کہنا ہے کہ ہتھیاروں کی نئی کھیپ یوکرین کو میدان جنگ میں اہم اہداف کو نشانہ بنانے کے قابل بنائے گی۔

بین الاقوامی خبریں سے مزید