ایمبر ہرڈ کا ہتکِ عزت کیس میں نئے ٹرائل کا مطالبہ مسترد

معروف امریکی اداکارہ ایمبر ہرڈ جو اپنے سابق شوہر، اداکار جانی ڈیپ کے خلاف ایک ماہ قبل ہتکِ عزت کا مقدمہ ہار گئی تھیں اور انہوں نے اس کیس میں نئے ٹرائل کا مطالبہ کیا تھا جو عدالت کی جانب سے مسترد کر دیا گیا ہے۔

رپورٹ کے مطابق امریکی عدالت نے ایمبر ہرڈ کی اپنے سابق شوہر، اداکار جانی ڈیپ کے حق میں سنائے گئے فیصلے کو کالعدم قرار دینے سے انکار کرتے ہوئے، کیس کے لیے نئے مقدمے کی سماعت کی درخواست کو مسترد کر دیا ہے۔

عدالت کی جانب سے فیصلے میں کہا گیا ہے کہ ’جیوری کے حوالے سے مکمل جانچ پڑتال کرنے کے بعد یہ فیصلہ کیا گیا ہے کہ اس جیوری اور تمام ججز نے اپنے حلف، عدالت کی ہدایات اور احکامات پر عمل کیا، اس لیے یہ عدالت جیوری کے مجاز فیصلے کی پابند ہے‘۔

خیال رہے کہ ایمبر ہرڈ کی قانونی ٹیم نے عدالت میں اس کیس کے فیصلے کو کالعدم قرار دینے کی درخواست جمع کروائی تھی اور مؤقف اپنایا تھا کہ کیس کی سماعت کے دوران جیوری میں ایسے ممبر کو شامل کیا گیا جو اس مقدمے کا حصّہ نہیں تھا۔

ایمبر ہرڈ نے جانی ڈیپ ہتک عزت کیس کے فیصلے پر سوال اٹھا دیا

اداکارہ کے وکلا نے امریکی عدالت میں ایک درخواست دائر کی ہے جس میں موقف اختیار کیا گیا ہے کہ جانی ڈیپ کی جانب سے دائر ہتک عزت کے کیس کا پورا عمل متاثر ہوا ہے۔

واضح رہے کہ ورجینیا کی عدالت نے جانی ڈیپ کے ہتکِ عزت کے دعوے کا فیصلہ ان کے حق میں سناتے ہوئے ایمبر ہرڈ کو نقصان کا ازالہ کرنے کے لیے اپنے سابق شوہر کو 15 ملین ڈالرز معاوضہ ادا کرنے کا حکم دیا تھا جبکہ جانی ڈیپ کو اپنی سابقہ اہلیہ کو 2 ملین ڈالرز کی ادائیگی کا حکم دیا تھا۔

اس کیس کے فیصلے میں عدالت نے قرار دیا تھا کہ 2018ء میں اپنے ایک مضمون میں ایمبر ہرڈ نے جانی ڈیپ کو بدنام کرنے کی کوشش کی تھی، جس میں انہوں نے یہ کہا تھا کہ سابق شوہر نے انہیں گھریلو تشدد کا نشانہ بنایا تھا۔