ہنسنے سے مضرِ صحت کولیسٹرول کم ہوتا ہے، تحقیق

11 اگست ، 2022

ہنسنا انسان کی صحت پر مثبت اثرات مرتب کرتا ہے یہاں تک کہ یہ انسان کو امراضِ قلب سے بچانے میں بھی مددگار ثابت ہوسکتا ہے۔

دی ہارٹ فاؤنڈیشن کے مطابق ہنسنے سے انسان کی صحت پر پڑنے والے اثرات کسی بھی قلبی ورزش کے برابر ہوتے ہیں۔

اس حوالے سے کی گئی تحقیق میں یہ بات سامنے آئی ہے کہ ہنسنے سے انسان کے دل کی دھڑکن بہتر اور جسم سے اتنی ہی کیلوریز کم ہوتی ہیں جتنی کہ چہل قدمی کرنے سے ہوتی ہیں۔

ہنسنے کا عمل جسم سے ایسے کولیسٹرول کو کم کرتا ہے جوکہ صحت کے لیے مضر ہو جبکہ مفید کولیسٹرول کو بڑھاتا ہے۔

تحقیق کے دوران کولیسٹرول کی زیادتی کا شکار ذیابیطس کے مریضوں میں ایک سال تک روزانہ آدھا گھنٹہ ہنسنے کے مثبت اثرات دیکھے گئے۔

سال کے آخر میں ذیابیطس ان مریضوں میں 26 فیصد مفید کولیسٹرول کا اضافہ دیکھا گیا۔

ہنسنے سے انسان کے ذہن پر موجود دباؤ کم ہوتا ہے، جس کی وجہ سے خون کی شریانیں کُھلتی ہیں اور فشارِ خون کم ہوتا ہے۔

یونیورسٹی آف میری لینڈ میڈیکل سینٹر میں کی گئی ایک تحقیق سے یہ بھی پتہ چلا ہے کہ ہنسنے کے دوران شریانیں نائٹرک آکسائیڈ خارج کرتی ہیں جو کہ ان شریانوں کے کُھلنےکا سبب بنتی ہے۔

نائٹرک آکسائیڈ کا تعلق سوزش اور شریانوں میں گٹھلیاں بننے میں کمی سے بھی ہے۔

اس حوالے سے ایک اور تحقیق جوکہ یونیورسٹی آف ٹیکساس میں کی گئی، مزاحیہ ویڈیو اور شریانوں میں پیدا ہونے والی فوری لچک کے درمیان تعلق بھی سامنے آیا ہے۔

صحت سے مزید