• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بد دیانتی سے سمدھی کے اثاثے جنرل باجوہ سے منسوب کیے گئے: آئی ایس پی آر

تازہ ترین
قومی خبریں
27 نومبر ، 2022
بد دیانتی سے سمدھی کے اثاثے جنرل باجوہ سے منسوب کیے گئے: آئی ایس پی آر

پاک فوج کے شعبۂ تعلقاتِ عامہ (آئی ایس پی آر) کا کہنا ہے کہ ایک خاص گروپ نے نہایت چالاکی و بد دیانتی کے ساتھ جنرل باجوہ کی بہو کے والد (سمدھی) اور فیملی کے اثاثوں کو آرمی چیف اور خاندان سے منسوب کیا ہے۔

آرمی چیف جنرل قمر جاوید باجوہ کے خلاف مذموم مہم پر پاک فوج کے شعبۂ تعلقاتِ عامہ (آئی ایس پی آر) نے شدید مذمت کی ہے۔

آئی ایس پی آر کے اعلامیے کے مطابق آرمی چیف جنرل قمر جاوید باجوہ اور ان کی فیملی کے اثاثوں سے متعلق سوشل میڈیا پر گمراہ کن اعداد و شمار شیئر کیے گئے ہیں، یہ گمراہ کن اعداد و شمار مفروضوں کی بنیاد پر بڑھا چڑھا کر پیش کیے گئے ہیں۔

پاک فوج کے شعبۂ تعلقاتِ عامہ کے مطابق ایک خاص گروپ نے نہایت چالاکی و بد دیانتی کے ساتھ جنرل باجوہ کی بہو کے والد (سمدھی) اور فیملی کے اثاثوں کو آرمی چیف اور خاندان سے منسوب کیا ہے۔

آئی ایس پی آر کا کہنا ہے کہ سراسر یہ غلط تاثر دیا جا رہا ہے کہ یہ اثاثے آرمی چیف جنرل باجوہ کے 6 سالہ دور میں ان کے سمدھی کی فیملی نے بنائے۔

پاک فوج کے شعبۂ تعلقاتِ عامہ نے بتایا ہے کہ یہ قطعی طور پر حقائق کے منافی اور کھلا جھوٹ اور بدنیتی پر مبنی ہے۔

آئی ایس پی آر نے مزید بتایا ہے کہ آرمی چیف جنرل قمر جاوید باجوہ، ان کی اہلیہ اور خاندان کا ہر اثاثہ ایف بی آر میں باقاعدہ ڈکلیئرڈ ہے، آرمی چیف و اہلِ خانہ باقاعدگی سے ٹیکس ریٹرن فائل کرتے ہیں۔

پاک فوج کے شعبۂ تعلقاتِ عامہ کا یہ بھی کہنا ہے کہ ہر شہری کی طرح آرمی چیف اور ان کے اہلِ خانہ ٹیکس حکام کے سامنے اپنے اثاثہ جات سے متعلق جواب دہ ہیں۔

قومی خبریں سے مزید