امام الحق نے شادی کے حوالے سے سوچنا شروع کردیا

پاکستان کرکٹ ٹیم کے کھلاڑیوں کو دلہا بنتے دیکھ کر اب امام الحق نے بھی دلہا بننے کے لیے سوچ بچار شروع کردی۔

پاکستان کرکٹ ٹیم کے اوپننگ بیٹر امام الحق نے سوشل میڈیا اکاؤنٹ پر کُلہّ پہن کر تصویر شیئر کرتے ہوئے لکھا کہ کسی اور کی شادی کے لیے کپڑوں کے ٹرائلز کر کے تھک چکا ہوں۔

امام الحق نے اپنی تصویر کھینچنے والے بابر اعظم سے کہا کہ مجھے لگتا ہے کہ اب ہمیں بھی کچھ سوچنا پڑ ے گا جناب۔

امام الحق نے اپنی پوسٹ میں ویڈنگ سیزن کا ہیش ٹیگ بھی استعمال کیا۔

امام الحق کی اس پوسٹ پر شاداب خان نے لکھا کہ امام مسئلہ یہ نہیں کہ تم شادی کرنا چاہتے ہو مسئلہ یہ ہے کہ تم سے کون شادی کرنا چاہتا ہے۔

شاداب خان کو سوشل میڈیا پر ہی جواب دیتے ہوئے امام الحق نے لکھا کہ پہلے میں بھی یہ سمجھتا تھا لیکن پھر میں نے کہا کہ اگر تیری ہوسکتی ہے تو پھر اپنا بھی کام بن ہی جائے گا۔

سوشل میڈیا پر ٹیسٹ کرکٹر فواد عالم نے بھی امام الحق اور شاداب خان کی گفتگو کو نوٹس کیا۔

فواد عالم نے دونوں کھلاڑیوں کو جواب دیتے ہوئے لکھا کہ امام ڈرامے نہ کرو، سچ بتادو اپنے وارڈ روب سلیکشن کے لیے گئے تھے ناں تم۔

سوشل میڈیا پر قومی کرکٹرز کی اس دلچسپ گفتگو کو مداحوں نے بھی خوب پسند کیا۔

یاد رہے کہ گزشتہ ماہ فاسٹ بولر حارث رؤف اور مزنا مسعود ملک کے نکاح کی مختصر تقریب اسلام آباد میں ہوئی تھی جبکہ شان مسعود کی شادی رواں ماہ ہوئی۔

اس کے علاوہ شاداب خان کا نکاح بھی رواں ماہ ہوا ہے۔