کراچی: اتحاد ٹاؤن میں گیس کی عدم فراہمی پر مکینوں کا احتجاج، ہیڈ آفس کا گھیراؤ

کراچی میں بلدیہ ٹاؤن کے علاقے اتحاد ٹاؤن میں سوئی گیس کی عدم فراہمی پر مکینوں نے گلشنِ اقبال میں سوئی گیس ہیڈ آفس کا گھیراؤ کر لیا۔

پولیس کے مطابق بلدیہ ٹاؤن کے علاقے اتحاد ٹاؤن اور اطراف کے مکینوں کی بڑی تعداد بسوں اور مختلف گاڑیوں میں بھر کر گلشنِ اقبال میں حسن اسکوائر کے قریب واقع سوئی سدرن گیس کمپنی کے ہیڈ آفس پہنچی۔

مکین دفتر کے باہر احتجاج کرتے رہے، اس موقع پر مشتعل افراد ہیڈ آفس کی دیوار پھلانگ کر دفتر میں گھس گئے، بیشتر افراد دھرنا دے کر مرکزی شاہراہ پر بیٹھ گئے۔

کراچی تا پشاور: عوام گیس قلت سے پریشان، اخراجات بڑھ گئے

کراچی سے لے کر پشاور تک عوام کو گیس کی دستیابی کے مسائل نے پریشانی میں مبتلا کردیا۔

مکینوں نے مختلف قسم کے بینرز اور پلے کارڈز اٹھا رکھے تھے جن پر کافی عرصے سے بلدیہ ٹاؤن اور سعید آباد کی مختلف آبادیوں میں گیس کی عدم فراہمی کا شکوہ کیا گیا تھا۔

سینیئر سپرنٹنڈنٹ پولیس ایسٹ زبیر نذیر شیخ کے مطابق احتجاج کے دوران ممکنہ گڑبڑ کے پیشِ نظر مختلف تھانوں کی نفری کو موقع پر طلب کیا گیا ہے۔