شادی کیلئے رینا رائے کی خوبصورتی سے متاثر نہیں ہوا تھا، محسن خان

16 مارچ ، 2023

پاکستانی کرکٹر اور اداکار محسن خان نے کہا ہے کہ وہ شادی کےلیے بھارتی اداکارہ رینا رائے کی خوبصورتی سے متاثر نہیں ہوئے تھے۔

واضح رہے کہ پاکستان کے سابق ٹیسٹ کرکٹر محسن خان نے 1983 میں خوبرو اداکارہ رینا رائے سے شادی کی تھی۔

دونوں کی شادی 1990 کے عشرے میں اختتام پذیر ہوئی۔ محسن نے بیٹی کی کفالت حاصل کی لیکن جب محسن خان نے دوسری شادی کی تو بیٹی کی کفالت ان کے پاس سے چلی گئی۔

نجی ٹی وی چینل پر اسپورٹس پروگرام کے دوران گفتگو کرتے ہوئے محسن خان کا کہنا تھا کہ مجھے اپنی شادی پر کوئی پچھتاوا نہیں، میں نے ایک انسان سے شادی کی تھی، میں نے یہ نہیں دیکھا تھا کہ وہ کون ہے اور اس کا تعلق کہاں سے ہے۔

انہوں نے کہا کہ میں نے فیصلہ کرلیا تھا کہ میں پاکستان میں رہنا چاہتا ہوں، حتیٰ کہ میں انگلینڈ کھیلنے کے لیے گیا لیکن رہنا پاکستان میں ہی چاہتا تھا۔