ویرات کوہلی کا انوشکا شرما کو سرپرائز دینےکا منصوبہ کیسے ناکام ہوا؟

28 مارچ ، 2023

بھارتی کرکٹ ٹیم کے سابق کپتان ویرات کوہلی نے انکشاف کیا کہ وہ جب بھی اہلیہ انوشکا شرما کو کوئی سرپرائز دینا چاہتے ہیں تو ناکام ہوجاتے ہیں۔

حال ہی میں اس جوڑی نے انڈین اسپورٹس آنرز 2023ء میں شرکت کی جہاں ایک دوسرے کے بارے میں کیے گئے سوالات کے جواب دیتے ہوئے انوشکا شرما نے انکشاف کیا کہ ویرات کوہلی جب بھی مجھے سرپرائز دینے کی کوشش کرتے ہیں تو ان کا پلان فیل ہوجاتا ہے۔

ویرات کوہلی نے انوشکا شرما کی اس بات سے اتفاق کرتے ہوئے کہ ابھی کچھ دنوں پہلے ہی یہ جب بنکاک شوٹنگ کے لیے گئی تھیں تو جاتے ہوئے یہ خود چلی گئی تھیں اور مجھ سے کہا کہ گھر میں بیٹی وامیکا کے ساتھ ہی رہو اور مجھے ایئر پورٹ آنے کی ضرورت نہیں ہے۔

اُنہوں نے بتایا کہ پھر جب یہ بنکاک سے واپس آئیں تو مجھ سے غلطی یہ ہوئی کہ میں جاگ رہا تھا تو میں نے اُنہیں میسج کرکے پوچھ لیا کہ کیا آپکی فلائٹ لینڈ ہوگئی ہے اور پھر جب میں ایئر پورٹ پہنچا تو مجھے پورا یقین تھا کہ اس بار تو ہو ہی نہیں سکتا کہ انہیں پتا چل جائے کہ میں اُنہیں ایئر پورٹ سے لینے خود آرہا ہوں۔

اُنہوں نے مزید بتایا کہ جب میں ایئر پورٹ پہنچا تو اُنہوں نے گاڑی میں بیٹھتے ہی مجھے دیکھ کر مسکرا کر کہا ’ہائے‘ تو میں نے پوچھا کہ آپ کو کیسے پتا چلا کہ میں آپ کو لینے کے لیے آرہا ہوں تو اُنہوں نے کہا کہ جب آپ کا میسج آیا تھا تو میں تبھی سمجھ گئی تھی کہ آپ آنے والے ہیں۔

انٹرٹینمنٹ سے مزید