انصاف کا جھنڈا میرے ہاتھ میں ہے، شاہ محمود قریشی

06 جون ، 2023

وائس چیئرمین پاکستان تحریک انصاف (پی ٹی آئی) شاہ محمود قریشی نے کہا ہے کہ انصاف کا جھنڈا آج بھی میرے ہاتھ میں ہے۔

راولپنڈی میں اڈیالہ جیل سے رہائی کے بعد میڈیا سے گفتگو میں شاہ محمود قریشی نے کہا کہ پی ٹی آئی کے کارکنوں سے کہتاہوں انصاف کا جھنڈا آج بھی میرے ہاتھ میں ہے۔

انہوں نے اس دوران کل چیئرمین تحریک انصاف سے ملاقات کرنے کا اعلان کیا اور کہا کہ میں پی ٹی آئی کا حصہ ہوں،کل پارٹی چیئرمین سے ملاقات کروں گا۔

وائس چیئرمین پی ٹی آئی نے مزید کہا کہ قیدتنہائی میں ایک ماہ گزرا، سوچنے کا موقع ملا، دوبارہ گرفتاری کا میری نظر میں کوئی جواز نہیں تھا۔

اُن کا کہنا تھاکہ ڈپٹی کمشنر راولپنڈی کےکہنےپرتھری ایم پی اوکےتحت دوبارہ گرفتار کیاگیا، پوچھتا ہوں میں تو قید میں تنہائی میں تھا، میں کس کو ہدایت یا اکسا سکتا تھا؟

شاہ محمود قریشی نے یہ بھی کہا کہ ایم پی او کے تحت میری دوبارہ گرفتاری ہوئی، جسے چیلنج کیا، پراسیکیوشن ٹھوس ثبوت نہ پیش کرسکا، جس پر مجھے رہائی ملی۔

انہوں نے کہا کہ پی ٹی آئی کارکنوں سے کہنا چاہتا ہوں کہ آزمائش کا وقت ہے، کارکن ہمت نہ ہاریں، حوصلے میں رہیں، غروب کے بعد طلوع بھی ہوتا ہے۔

وائس چیئرمین پی ٹی آئی نے کہا کہ جیلوں میں تاحال کئی بے گناہ کارکنان موجود ہیں، جنہیں رہا ہونا چاہیے، ان کے کیسز کو فالو کریں گے۔

اُن کاکہنا تھاکہ میں قید تنہائی سے رہائی کے بعد اپنے اہلخانہ ، بیوی ، بچوں ،بہنوں اور خاندان کا شکریہ ادا کرنا چاہتا ہوں۔

شاہ محمود قریشی نے کہا کہ میری گرفتاری سے پہلے اہلیہ کا آپریشن ہوا،میں نے بتایا کہ اسلام آباد جانا ہے، اہلیہ نے مجھ سے کہا آپ اللّٰہ کے حوالے ہیں، آپ اسلام آباد جائیں۔

انہوں نے یہ بھی کہا کہ اس موقع پر میرے اہل خانہ نے مجھ سے کہا کہ ہماری وجہ سے ہر گز دباؤ میں نہیں آنا،میری قید میں میرے بچوں نے میرا بہت ساتھ دیا۔

وائس چیئرمین پی ٹی آئی نے میڈیا کے سوال کا جواب دینے سے گریز کیا اور کہا کہ کل پی ٹی آئی چیئرمین سے ملاقات کے بعد میڈیا سے مفصل بات کروں گا۔

قومی خبریں سے مزید