فرمان الہی
نماز کے اوقات
پاک فوج کے شعبے انٹر سروسز پبلک ریلیشنز (آئی ایس پی آر) نے 76ویں جشن آزادی کے موقع پر 2 خصوصی ملی نغمے جاری کردیے ہیں۔
آئی ایس پی آر کے ’جان کی قیمت‘ اور ’تو جان وطن‘ کے عنوان سے جاری کردہ ملی نغمات میں آزادی کی راہ میں شہید ہونے والوں کی قربانیوں کو خراج عقیدت پیش کیا گیا ہے۔
ملی نغمہ ’جان کی قیمت‘ نامور گلوکار عاطف اسلم نے پڑھا ہے جبکہ دوسرا ’تو جان وطن‘ گلوکار کامران اللّٰہ خان کی آواز میں پیش کیا گیا ہے۔
آج آزادی کی 76ویں سالگرہ کے موقع پر ملک بھر میں اس دن کو ملی جوش و جذبے کے ساتھ منایا اور شہدا کی قربانیوں کو یاد رکھا اور انہیں خراج عقیدت پیش کیا جارہا ہے۔
اس موقع کی مناسبت سے پاک فوج نے اپنے یوٹیوب چینل پر 2 مختلف ملی نغمے ’جان کی قیمت‘ اور ’توجان وطن‘ جاری کیے۔
ملی نغمہ ’جان کی قیمت‘ کو آزادی کی راہ، وطن کے دفاع اور ملک و قوم کی خاطر اپنی جان کا نذرانہ پیش کرنے والے شہیدوں کو خراج عقیدت پیش کرتے ہوئے ان کے نام کیا گیا ہے۔
جبکہ دوسرے ملی نغمے ’توجان وطن‘ میں پاکستانی قوم کی وطن عزیز سے والہانہ محبت کا ذکر کیا گیا ہے کہ قوم ہر حال میں اپنے وطن عزیز کے ساتھ قدم سے قدم ملا کر کھڑی ہے اور ہمیشہ کھڑی رہے گی۔
