روس: خواتین کیلئے شہریت کے قوانین میں نرمی

02 مئی ، 2024

روس نے اپنے شہریت کے قوانین میں نرمی کرتے ہوئے شہریت کی درخواست دینے والی غیر ملکی خواتین کو دستاویزات کے لیے باحجاب تصاویر جمع کرانے کی اجازت دے دی۔

روسی میڈیا کے مطابق روسی وزارت داخلہ نے بیان جاری کرتے ہوئے کہا ہے کہ نئے قانون کا اطلاق 5 مئی سے ہوگا جس کے تحت شہریت کی درخواست دینے والی خواتین باحجاب اپنی تصاویر بمہ ضروری دستاویزات جمع کراسکیں گی۔

روسی وزارت داخلہ کا کہنا ہے کہ ایسی تمام درخواست گزار خواتین جن کے مذہبی عقائد انہیں اجنبیوں کے سامنے سر ڈھانپے بغیر آنے سے روکتے ہیں، وہ اپنی اسکارف والی تصاویر جمع کراسکتی ہے۔

جاری کردہ بیان میں یہ وضاحت بھی کی گئی ہے کہ درخواست کے ساتھ فراہم کی گئی تصاویر میں چہرہ چھپا ہوا نہیں ہونا چاہیے اور ایسی تصاویر جن میں درخواست گزار کی ٹھوڑی مکمل یا جزوی ڈھکی ہوئی ہو وہ تصاویر بھی ناقابل قبول ہوں گی۔

خیال رہےکہ روسی خواتین کو پہلے ہی سرکاری دستاویزات جیسے پاسپورٹ، ڈرائیونگ لائسنس اور ورک پرمٹ وغیرہ کے لیے باحجاب تصاویر استعمال کرنےکی اجازت ہے۔

تاہم روسی حکام کا کہنا ہےکہ نئے قوانین درخواست گزاروں کو اپنے مذہبی عقائد پر عمل کرنے کی اجازت دینے کے ساتھ ریاست کی سیکیورٹی کو بھی یقینی بنائیں گے۔

بین الاقوامی خبریں سے مزید