ٹی ڈیپ کی زیر سرپرستی 11 پاکستانی کمپنیوں کے وفد کا دورہ ہیوسٹن، تجارتی معاملات پر گفتگو

 

امریکی ریاست ٹیکساس کے شہر ہیوسٹن میں، ہیوسٹن کراچی سسٹر سٹی ایسوسی ایشن کے تعاون سے گریٹر ہیوسٹن پارٹنرشپ نے ہیوسٹن چیمبر آف کامرس کے دفتر میں ٹریڈ ڈیولپمنٹ اتھارٹی آف پاکستان کی زیر سرپرستی سیالکوٹ کی 11 اہم کمپنیوں پر مشتمل پاکستانی تجارتی وفد کے ساتھ اہم بزنس میٹنگ کی میزبانی کی۔ 

گریٹر ہیوسٹن پارٹنرشپ (جی ایچ پی) کے نائب صدر جان سائفر نے اپنی بین الاقوامی تجارتی ترقی کی ٹیم کے ساتھ وفد کا خیرمقدم کیا اور ایک خصوصی پاور پوائنٹ پریزنٹیشن کے ذریعے ہیوسٹن اور پاکستان کے تجارتی تعلقات کو نمایاں کیا۔ 

اس موقع پر پاکستان قونصل خانے کے تجارت اور سرمایہ کاری کے اتاشی مسٹر سلمان رضا اور صدر ہیوسٹن کراچی سسٹر سٹی ایسوسی ایشن محمد سعید شیخ بھی موجود تھے۔ 

مسٹر جان سائفر نے ہیوسٹن شہر کے اہم شعبوں بشمول لاجسٹک، ہیلتھ کیئر، انرجی اور ایرو اسپیس پر روشنی ڈالی۔ انہوں نے وفد کو بتایا کہ کس طرح ہیوسٹن نے امریکہ میں سب سے بڑی بندرگاہ رکھنے والے امریکہ کے چوتھے بڑے شہر کے طور پر کام کیا ہے۔ انھوں نے کہا کہ ہیوسٹن ایک ایسا علاقہ ہے جس میں کاروباری ترقی کے لیے زبردست مراعات ہیں۔ 

سیالکوٹ کے کاروباری وفد نے اس موقع پر بتایا کہ کس طرح سیالکوٹ، کھیلوں کی دنیا میں فٹ بال سے لے کر ریسنگ اسپورٹس، لیدر گارمنٹس اور ہیلتھ کیئر پروڈکٹس کا مرکز ہے۔ مسٹر جان سائفر اور مسٹر سلمان رضا نے پاکستان اور ہیوسٹن کے درمیان تعلقات کو فروغ دینے کے مختلف طریقہ کار پر تبادلہ خیال کیا۔ 

اس موقع پر اتفاق کیا گیا کہ مستقبل میں گریٹر ہیوسٹن پارٹنرشپ کے تعاون سے ایک امریکی وفد، اکتوبر میں ہونے والی پاکستان بزنس ایکسپو میں شرکت کرے گا۔ اس کے ساتھ ساتھ ہیوسٹن میں پاکستانی کمپنیوں اور تجارتی وفود کے لیے کاروباری ترقی کے سلسلے میں تعاون کی راہیں تلاش کی جائیں گی۔

ہیوسٹن کراچی سسٹر سٹی ایسوسی ایشن کے صدر محمد سعید شیخ نےجی ایچ پی چینل کے ذریعے پاکستان کے ساتھ تجارت بڑھانے کی ضرورت پر زور دیا اور ہیوسٹن کراچی سسٹر سٹی اسوسی ایشن کا اس کام کے حصول میں بھرپور تعاون کا یقین دلایا۔

مسٹر جان سائفر نے حکومت پاکستان اور مندوبین کی کوششوں کو سراہا اور مستقبل میں تعاون کا یقین دلایا۔ یہ نتیجہ بھی اخذ کیا گیا کہ پاکستانی کمپنیوں اور ہیوسٹن کے درمیان اس طرح کے اقدامات کی کوششیں مستقل طور پر جاری رہنی چاہئیں۔ چیف ڈیلیگیٹ ذیشان زیب نے جی ایچ پی کو سیالکوٹ چیمبر شیلڈ پیش کی۔