وقت آگیا بابراعظم، شاہین و دیگر سینئرز کو آرام کرایا جائے، شنواری

کراچی(اسٹاف رپورٹر) پاکستان کے ٹیسٹ فاسٹ بولر عثمان خان شنواری نے ٹی ٹوئنٹی ورلڈکپ میں قومی ٹیم کی ناقص پر کہا ہے کہ وقت آگیا ہے کہ کپتان بابر اعظم، شاہین آفریدی اور دیگر سینئرز کو آرام کرایا جائے۔بائیں ہاتھ کے ٹیسٹ فاسٹ بولر عثمان خان شنواری ان دنوں امریکی ریاست ہیوسٹن میں کلب کرکٹ کھیل رہے ہیں، 30 سالہ عثمان شنواری نے پاکستان کے لیے ایک ٹیسٹ 16 ون ڈے اور 17 ٹی 20 کھیلے ہیں، پاکستان کرکٹ میں نئے اور نوجوان کھلاڑیوں کو موقع ملنا چاہیے لیکن یہ اسی وقت ممکن ہوگا جب سینئرز ، جونیئرز کے لیے راستہ فراہم کریں گے۔ پاکستان کرکٹ صرف 15 کھلاڑیوں تک محدود ہو کر رہ گئی ہے، یہ کھلاڑی زمبابوے، بنگلا دیش اور آئرلینڈ کے خلاف بھی باہر نہیں بیٹھے، پھر نئے کھلاڑیوں کو کب اور کہاں موقع ملے گا۔ ڈومیسٹک کرکٹرز کو موقع ملنا چاہیے، مواقع نہ ملنے کی وجہ سے کرکٹرز ملک چھوڑ کر جانے پر مجبور ہیں۔ٹیسٹ فاسٹ بولر کا کہنا تھا ان کی کرکٹ ابھی باقی ہے، البتہ انہیں نہیں معلوم کہ وہ ٹیم سے کیوں باہر ہیں۔