اختلاف رائے کے باوجود مولانا فضل الرحمٰن کیساتھ بیٹھوں گا، صاحبزادہ حامد رضا

سنی اتحاد کونسل کے سربراہ صاحبزادہ حامد رضا نے کہا ہے کہ اختلاف رائے کے باوجود بھی مولانا فضل الرحمٰن کےساتھ بیٹھوں گا۔

جیو نیوز سے گفتگو کرتے ہوئے صاحبزادہ حامد رضا نے کہا کہ میرے مؤقف کے دوسرے حصے کو ہمیشہ نظر انداز کر دیا جاتا ہے، اتحاد میں کثرت رائے یا اتفاق رائے سے فیصلے ہوں تو مجھے قبول ہو گا۔

انہوں نے کہا کہ اگر چار ایک یا کثرت رائے سے فیصلہ ہوتا ہے کہ مولانا کے ساتھ جانا ہے تو میں بھی شامل ہوں گا۔

سنی اتحاد کونسل کے سربراہ حامد رضا کی فضل الرحمان کے ساتھ اتحاد کی مخالفت

حامد رضا نے کہا کہ شیرافضل مروت کو میڈیا پر شبلی فراز سے استعفے کا مطالبہ نہیں کرنا چاہیے تھا۔

 صاحبزادہ حامد رضا کا کہنا ہے کہ میں نے اپنا نکتہ نظر رکھا اسکے باوجود مولانا کے ساتھ جانے کا فیصلہ ہوا تو شامل ہوں، کثرت رائے سے اتحاد کے فیصلوں کا پابند ہوں۔

سنی اتحاد کونسل کے سربراہ نے مزید کہا کہ اتحاد کے فیصلے کو مانتے ہوئے مولانا فضل الرحمٰن کے ساتھ بیٹھوں گا۔

ان کا یہ بھی کہنا ہے کہ آج سے 5 روز قبل مولانا عطا الرحمٰن سینیٹ مذہبی امور کمیٹی کے چیئرمین منتخب ہوئے، وہ مسلم لیگ ن کے تائید کنندہ کے طور پر منتخب ہوئے، ایسے اقدامات سے خدشات پیدا ہوتے ہیں۔