سانحہ 9 مئی کا اعتراف جرم کرنے والے اب ثبوت مانگ رہے ہیں، طلال چوہدری

مسلم لیگ ن کے رہنما طلال چوہدری نے کہا ہے کہ سانحہ 9 مئی کا اعتراف جرم کرنے والے اب ثبوت مانگ رہے ہیں۔

بانی پی ٹی آئی کے مشروط معافی کے بیان پر ردعمل کا اظہار کرتے ہوئے طلال چوہدری نے کہا کہ 9 مئی کو کور کمانڈرہاﺅس کے باہر بانی پی ٹی آئی کی تینوں بہنیں، بھانجا اور پارٹی رہنما موجود تھے۔ سی سی ٹی وی ویڈیوز میں کور کمانڈر ہاؤس کے باہر ان کے لیڈر دیکھے جاسکتے ہیں۔

بانی پی ٹی آئی نے مشروط معافی مانگنے کا اعلان کردیا

بانی پی ٹی آئی نے کہا کہ اگر پی ٹی آئی کے لوگ ملوث پائے گئے ان کو پارٹی سے نکالوں گا اور سزا بھی دلواؤں گا۔

طلال چوہدری نے کہا کہ تحریک انصاف نے کورکمانڈر ہاؤس، فوجی تنصیبات، حساس عمارتوں اور شہدا کی یادگاروں کی بے حرمتی کی۔ ان کی پارٹی کے لوگوں نے کہا کہ بانی پی ٹی آئی نہیں تو پاکستان نہیں۔

انھوں نے کہا کہ ان کی سیاست ہمیشہ سے جلاﺅ گھیراﺅ پر مبنی رہی ہے۔ انہوں نے پی ٹی وی پر حملہ کیا، پارلیمنٹ ہاﺅس کا گیٹ توڑا۔ یہ کبھی گریبان پکڑتے ہیں اور کبھی پاﺅں۔

طلال چوہدری نے بانی پی ٹی آئی کو مخاطب کرتے ہوئے کہا کہ مشروط معافی مانگنے سے بہتر ہے غیر مشروط معافی مانگ لی جائے۔