روسی نائب وزیراعظم کی پاکستانی ہم منصب سے ملاقات، اہم امور پر تبادلہ خیال

روس کے نائب وزیراعظم الیکسی اوورچک نے کہا ہے کہ پاکستان سے آزاد تجارتی معاہدے پر بات چیت کی ہے۔

پاکستانی ہم منصب اور وزیر خارجہ اسحاق ڈار سے ملاقات کے بعد دفتر خارجہ اسلام آباد میں مشترکہ پریس کانفرنس کی۔

روسی نائب وزیراعظم نے کہا کہ روس ریلوے اور سڑکوں کے روابط میں دلچسپی رکھتا ہے، ہمیں خوشی ہے کہ پاکستان نے برکس میں شمولیت کےلیے اپلائی کیا ہے۔

انہوں نے مزید کہا کہ ہم نے نارتھ ساؤتھ ٹرانسپورٹ کوریڈور اور یور ایشین اکنامک یونین کوجوائن کرنے کے فوائد کے بارے پاکستان کو آگاہ کیا ہے۔

آرمی چیف سے روسی نائب وزیراعظم کی ملاقات، دفاعی تعاون کو مضبوط کرنے کا عزم

پاک فوج کے شعبہ تعلقات عامہ آئی ایس پی آر کے مطابق روس کے نائب وزیراعظم الیکسی اوورچک نے جی ایچ کیو کا دورہ کیا۔

الیکسی اوورچک نے یہ بھی کہا کہ برکس اور شنگھائی تعاون تنظیم سسٹر آرگنائزیشنز ہیں، تاہم ملکوں کی شمولیت اتفاق رائے سے ہوتی ہے۔

اُن کا کہنا تھا کہ میرے ہمراہ آئے وفود پاکستانی حکام سے مختلف شعبوں میں تعاون پر تفصیلی بات چیت کریں گے۔

اس موقع پر اسحاق ڈار نے کہا کہ پاکستان اور روس نے توانائی، تجارت، ثقافتی اور تعلیمی تعاون کو مزید وسعت اور فروغ دینے پر اتفاق کیا ہے ، دونوں ممالک عالمی فورمز پر مختلف ایشوز پر اتفاق رائے رکھتے ہیں۔

انہوں نے کہا کہ پاکستان روس بین الوزارتی کمیشن کے آئندہ اجلاس کےلیے تیاریاں جاری ہیں، افغانستان میں امن و استحکام کےلیے روس کے ساتھ روابط کے فروغ کےلیے پرعزم ہیں۔

پاکستانی نائب وزیراعظم نے مزید کہا کہ روس کے مسلم دنیا اور او آئی سی کے رکن ممالک کے ساتھ بہترین تعلقات ہیں، برکس میں پاکستان کی شمولیت کے حوالے روس کی حمایت کو سراہتے ہیں۔

ان کا کہنا تھا کہ پاکستان برکس میں شمولیت کےلیے کوشاں ہے، تاہم برکس کا ممبر بننے کےلیے ایک طریقہ کار ہے، جس کو پاکستان پورا کرے گا، تاہم برکس کی ممبرشپ کسی اکثریتی فیصلے سے نہیں بلکہ اتفاق رائے کے تحت ہوتی ہے۔

بعد ازاں روس کے نائب وزیراعظم نے جنرل ہیڈ کوارٹر (جی ایچ کیو) کا دورہ کیا اور آرمی چیف جنرل عاصم منیر سے ملاقات کی ۔

آئی ایس پی آر کے مطابق ملاقات میں باہمی دلچسپی کے امور، علاقائی سلامتی کی صورتحال اور مختلف شعبوں میں دوطرفہ تعاون پر گفتگو ہوئی۔