فرمان الہی
نماز کے اوقات
پاکستانی اداکارہ میرا کی بہن شائستہ عباس نے اپنی والدہ شفقت زہرہ کے انکشاف کہ انگریزی نہ آنے کی وجہ سے ان کی بیٹی میرا پر لندن میں آنے پر پابندی لگ گئی ہے، پر لب کشائی کی ہے۔
حال ہی میں ’جیو نیوز‘ کے نمائندے مرتضیٰ علی شاہ سے شائستہ عباس نے لندن میں گفتگو کی اور میرا پر عائد 10 برس کی پابندی کے حوالے سے وضاحت کی۔
انہوں نے بتایا کہ جب میں 6 برس کی تھی اس وقت ہمارے والد کا انتقال ہو گیا تھا جس کے بعد گھر کی مکمل ذمے داری میرا پر آ گئی تھی، میرا تمام بہن بھائیوں میں سب سے بڑی ہیں۔
شائستہ عباس نے بتایا کہ وہ برطانیہ میں وکیل ہیں، میرا نے تمام بہن بھائیوں کو اعلیٰ تعلیم دی، تمام اہلِ خانہ کو والد کے انتقال کے فوراً بعد ہی برطانیہ میں سیٹل کر دیا تھا، ہماری مکمل تعلیم لندن کی ہے۔
انہوں نے بتایا کہ میں کچھ وقت کے لیے پاکستان آئی تھی، وہاں بزنس کی تعلیم حاصل کی لیکن جلد ہی لندن واپس آنے کے بعد میں نے وکالت کی تعلیم حاصل کی۔
شائستہ عباس نے یہ بھی بتایا کہ میرا نے ویزا درخواست فارم میں غلط انگریزی لکھ دی تھی، جس کی وجہ سے ان پر 10 برس کی پابندی لگی تھی، جو اب مکمل ہو چکی ہے۔
انہوں نے بتایا کہ میرا کی غلطی بہت معمولی سی تھی لیکن برطانوی حکومت نے اسے بہت سنجیدگی سے لے لیا اور ان پر 10 برس کی پابندی لگا دی تھی، یہ ان دنوں کی بات ہے جب ہمارے درمیان اختلافات چل رہے تھے۔
انہوں نے اپنے اور میرا کے درمیان اختلافات پر بھی بات کی اور بتایا کہ میں لندن میں رہنا چاہتی تھی جبکہ میرا پاکستان میں رہنا چاہتی تھیں اور یہ بھی چاہتی تھیں کہ میں پاکستان واپس آ کر شوبز انڈسٹری جوائن کروں لیکن میں ایسا نہیں چاہتی تھی۔
