فرمان الہی
نماز کے اوقات
پاکستان ریٹیل بزنس کونسل (پی آر بی سی) نے اسلام آباد میں پاکستان ریٹیل بزنس کونسل کانفرنس 2025 کا کامیاب انعقاد کیا جس میں ریٹیل سیکٹر کے اہم اسٹیک ہولڈرز، پالیسی سازوں اور انڈسٹری کے سرکردہ رہنماؤں نے شرکت کی۔
کانفرنس کا موضوع ’ریٹیل کا جدید تصور: اختراع، تعاون اور فروغ‘ تھا، جس کے تحت ریٹیل کے مستقبل پر تفصیلی گفتگو کی گئی۔ کانفرنس میں مختلف پینل، مباحثوں کی دلچسپ لائن اپ اور کلیدی خطابات شامل تھے، جن کا مقصد ریٹیل سیکٹر میں تعاون اور ترقی کو فروغ دینا تھا۔
تقریب کا آغاز پی آر بی سی کے چیئرمین زید بشیر کے افتتاحی کلمات سے ہوا، جس کے بعد وزیر خزانہ و محصولات سینیٹر محمد اورنگزیب نے کلیدی خطاب میں ریٹیل سیکٹر کی معیشت میں اہمیت کو اُجاگر کیا۔
اس موقع پر چیئرمین پی آر بی سی زید بشیر نے شرکاء سے خطاب کرتے ہوئے کہا، ’ریٹیل پاکستانی معیشت میں ریڑھ کی ہڈی کی حیثیت رکھتی ہے، جو جی ڈی پی میں نمایاں حصہ ڈالنے کے ساتھ لاکھوں افراد کو روزگار فراہم کرتے ہوئے تجارت کو فروغ دے رہا ہے۔ یہ کانفرنس ہمارے عزم کا اعادہ کرتی ہے کہ ہم اس شعبے میں جدت، اشتراک اور ترقی کے ذریعے آگے بڑھیں گے۔‘
وزیر خزانہ و محصولات سینیٹر محمد اورنگزیب نے حکومتی معاونت پر روشنی ڈالتے ہوئے کہا، ’مضبوط ریٹیل سیکٹر ایک مستحکم معیشت کےلیے ناگزیر ہے۔ حکومت ریٹیلرز کےلیے سازگار ماحول پیدا کرنے اور پالیسی اصلاحات کے ذریعے ترقی اور ڈیجیٹل ایڈوانسمنٹ کو یقینی بنانے کےلیے پُرعزم ہے۔‘
کانفرنس میں وزیر منصوبہ بندی و ترقی احسن اقبال نے بھی خطاب کیا، انکا کہنا تھا کہ ’ریٹیل ایک تبدیلی کے دوراہے پر ہے اور اس کی ترقی میں ٹیکنالوجی کا استعمال کلیدی کردار ادا کرے گا۔ پبلک پرائیویٹ اشتراک ایک مضبوط اور متحرک ریٹیل ایکو سسٹم کے قیام میں مددگار ثابت ہوگا۔‘
کانفرنس میں مختلف اہم پینل مباحثے بھی منعقد کیے گئے۔
ایک اور اہم پینل ’ریٹیل میں ٹیکسیشن اصلاحات: پی او ایس، ٹیکنالوجی اور ٹیکس نیٹ کے فروغ‘ کے عنوان پر تھا، جس کی میزبانی سدرہ اقبال نے کی۔
اس میں چین اسٹور ایسوسی ایشن آف پاکستان کے چیئرمین اسفندیار فرخ، اسٹیٹ بینک کے ڈپٹی گورنر سلیم اللّٰہ، ایف بی آر کے ممبر لیگل میر بادشاہ خان وزیر اور حبّل کے سی ای او عمر بن احسن نے شرکت کی۔
ایک مباحثہ ’پاکستانی ریٹیلرز: عالمی منڈی میں وسعت‘ کے عنوان سے ہونے والے پینل کو فن لینڈ میں پاکستان کے اعزازی قونصل جنرل اور فن لینڈ-پاکستان بزنس کونسل کے چیئرمین ویلی ایرولا نے ماڈریٹ کیا، جبکہ اس میں سروس سیلز کارپوریشن کے ایگزیکٹو ڈائریکٹر احمد حسین، کارفور پاکستان کے کنٹری منیجر عمر لودھی، کراچی ایس ٹی اے کی بانی اور چیف ایڈیٹر سلیمہ فیرستا اور وفاقی وزیر تجارت جام کمال خان نے شرکت کی۔
مستقبل کے رہنماؤں کی رہنمائی کے موضوع پر ایک سیشن عارفہ نور کی نظامت میں ہوا، جس میں سیفام کی بانی اور منیجنگ ڈائریکٹر سیما عزیز، باٹا پاکستان کے سی ای او محمد عمران ملک، لاما ریٹیل کی کریٹیو ڈائریکٹر اور شریک بانی امل خان اور سائبر انٹرنیٹ سروسز کے سی ای او دانش لاکھانی نے شرکت کی۔
آخری پینل ’ای کامرس اور ڈیجیٹل پیمنٹ: ریٹیل کے منظرنامہ میں انقلاب‘ کے عنوان سے تھا، جس کی میزبانی سمیرہ خان نے کی جبکہ پینل میں پی آر بی سی کے چیئرمین زید بشیر، دراز کے منیجنگ ڈائریکٹر احسان سایا، ون لنک کے چیف آپریٹنگ آفیسر (سی او او) بشیر خان اور کیونو کے سی ای او سعد نیازی نے شرکت کی۔
پاکستان ریٹیل بزنس کانفرنس 2025 نے یہ ثابت کیا کہ کونسل ریٹیل سیکٹر میں مثبت تبدیلی لانے اور بامعنی مکالمے کو فروغ دینے کےلیے پُرعزم ہے۔
انڈسٹری کے رہنماؤں اور پالیسی سازوں کو یکجا کر کے اس کانفرنس نے واضح کیا کہ کس طرح جدت اور اشتراک کے ذریعے ایک ترقی یافتہ اور مستقبل کے لیے تیار ریٹیل سیکٹر کی تشکیل ممکن ہے۔
