فرمان الہی
نماز کے اوقات
چیمپئنز ٹرافی کے تیسرے میچ میں جنوبی افریقا نے افغانستان کو 107 رنز سے شکست دے دی، 316 رنز کے ہدف کے تعاقب میں افغان ٹیم 208 رنز پر آؤٹ ہوگئی۔
کراچی میں کھیلے گئے میچ میں جنوبی افریقا نے افغانستان کے خلاف ٹاس جیت کر بیٹنگ کا فیصلہ کیا اور مقررہ 50 اوورز میں 6 وکٹ پر 315 رنز اسکور کیے۔
316 رنز کے ہدف کے تعاقب میں افغانستان کے عظمت اللّٰہ عمر زائی اور راشد خان نے 18، 18 رنز بنائے، رحمت شاہ نے 90 رنز کی شاندار اننگز کھیلی، انہوں نے ایک چھکا اور 9 چوکے بھی لگائے۔
جنوبی افریقی بولر کگیسو ربادا نے 3 کھلاڑیوں کو آؤٹ کیا، لیونگی نگیٹی اور ویان ملڈر نے 2، 2 وکٹیں حاصل کیں۔
اس سے قبل پہلے بیٹنگ کرتے ہوئے جنوبی افریقی ٹیم کی پہلی وکٹ 28 رنز پر گری، ٹونی ڈی زورزی 11 رنز بناکر میدان چھوڑ گئے۔
دوسری وکٹ پر ریان ریکی لٹن نے ٹمباباووما کے ساتھ مل کر اسکور میں 129 رنز کا اضافہ کیا، 157 کے اسکور پر ٹمباباووما 58 رنز بناکر پویلین لوٹ گئے۔
تیسری وکٹ اننگز کے سنچری میکر ریان ریکی لٹن کی گری، جو 103 رنز کی اننگز کھیل کر رن آؤٹ ہوگئے، اس وقت ٹیم کا اسکور 201 رنز تھا۔
جنوبی افریقا کی چوتھی وکٹ 248 رنز پر ڈاسن کی گری جو 52 رنز بناکر کیچ آؤٹ ہوئے جبکہ پانچویں آؤٹ ہونے والے کھلاڑی ڈیو ملر تھے، وہ 14 رنز بناکر پویلین لوٹے، اننگز کی چھٹی اور آخری وکٹ 299 کے مجموعے پر گری، مارکو جانسن صفر رنز پر میدان چھوڑ گئے۔
ایڈن مارکرم 52 اور ویان ملڈر 12 رنز کے ساتھ ناٹ آؤٹ رہے اور ٹیم کا مجموعی اسکور 315 رنز تک پہنچا دیا۔
افغانستان کی طرف سے محمد نبی نے 2، عظمت اللّٰہ عمر زئی، نور احمد اور فضل حق فاروقی نے 1،1 کھلاڑی کو پویلین بھیجا۔
ایونٹ کے ابتدائی 2 میچز میں نیوزی نے پاکستان اور بھارت نے بنگلادیش کو شکست سے دوچار کیا تھا۔
