فرمان الہی
نماز کے اوقات
شوال المکرم کا چاند نظر آگیا ہے، ملک بھر میں عیدالفطر کل منائی جائے گی۔
اسلام آباد میں پریس کانفرنس کرتے ہوئے چیئرمین رویت ہلال کمیٹی مولانا عبدالخبیر آزاد نے چاند کی رویت کا اعلان کیا۔
انہوں نے کہا کہ شوال کا چاند نظر آگیا، ملک میں عیدالفطر کل منائی جائےگی، ملک بھر سے چاند نظر آنے کی شہادتیں وصول ہوئیں۔
چیئرمین مرکزی رویت ہلال کمیٹی مولانا عبدالخبیر آزاد کی زیر صدارت اسلام آباد میں شوال کا چاند دیکھنے کےلیے اجلاس ہوا۔
اجلاس میں وزارت مذہبی امور، وزارت موسمیات کے حکام بھی شریک ہوئے، وزارت سائنس و ٹیکنالوجی اور سپارکو کے حکام نے ٹیکنیکل معاونت فراہم کی۔
واضح رہے کہ اسلام آباد اور گردونواح میں آج مطلع بالکل صاف رہا جبکہ محکمہ موسمیات نے بھی امکان ظاہر کیا تھا کہ اتوار کو کراچی سمیت ملک کے بیشتر علاقوں مطلع صاف ہوگا اور شوال کا چاند نظر آسکتا ہے۔
کراچی، لاہور، پشاور اور کوئٹہ سمیت مختلف شہروں میں زونل کمیٹیوں کے بھی اجلاس ہوئے۔
پشاور میں شوال کا چاند دیکھنے کےلیے زونل رویت ہلال کمیٹی کا اجلاس اوقاف ہال چارسدہ روڈ پر شام 6 بجے شروع ہوا۔ 10 رکنی کمیٹی میں 4 ارکان مرکز اور 6 زونل کمیٹی شریک تھے۔
پشاور میں ہونے والے اجلاس میں مولانااحسان الحق، مولانا عبدالبصیر مدنی، مولانا طیب قریشی، مولانا عابد حسین شاکری، مفتی جمیل رضوی شریک ہوئے۔
ادھر لاہور میں شوال کا چاند دیکھنے کےلیے زونل رویت ہلال کمیٹی کا اجلاس ایوان اوقاف میں ہوا، جس میں علما کرام، ماہرین فلکیات اور محکمہ موسمیات کے نمائندے شریک ہوئے۔
محکمہ موسمیات کے مطابق لاہور میں غروب آفتاب کے بعد 7 بج کر 37 منٹ تک چاند نظرآنے کا امکان تھا۔
محکمہ موسمیات کے مطابق لاہور میں مطلع صاف ہے اور عیدالفطر کا چاند نظر آنے کا دورانیہ 74 منٹ ہوگا۔
عیدالفطر کا چاند دیکھنے کےلیے زونل رویت ہلال کمیٹی کا اجلاس آج ڈی پی کمپلیکس کوئٹہ میں ہوا۔
اجلاس میں علماء کرام، ضلعی انتظامیہ اور محکمہ موسمیات کے حکام شریک ہوئے، زونل کمیٹی چاند نے رویت کے حوالے اور شہادتیں موصول ہونے کے بعد مرکزی کمیٹی کو آگاہ کیا۔
محکمہ موسمیات کا کہنا تھا کہ کوئٹہ سمیت بلوچستان کے بیشتر حصے میں مطلع صاف ہے اور صوبے میں شوال کا چاند نظر آنے کا امکان موجود ہے۔
وفاقی حکومت نے عیدالفطر کے موقع پر ملک بھر میں 3 دن کی چھٹی کا اعلان کیا ہے، جس کا آغاز پیر 31 مارچ سے ہوگا۔
دنیا کے کئی ممالک میں آج عیدالفطر منائی گئی ، جن میں سعودی عرب، متحدہ عرب امارات ، قطر ، کویت ، بحرین ، یمن ، فلسطین ،افغانستان، برطانیہ ،یورپی ممالک شامل ہیں۔
پاکستان میں عوامی نیشنل پارٹی کے سربراہ ایمل ولی خان نے آج عیدالفطر منانے کا اعلان کیا تھا۔
