فرمان الہی
نماز کے اوقات
آرمی چیف جنرل سید عاصم منیر نے کہا ہے کہ شہداء کا احترام ہر پاکستانی کے لیے مقدس ہے۔
انٹر سروسز پبلک ریلیشنز (آئی ایس پی آر) کےمطابق آرمی چیف جنرل سید عاصم منیر نے جی ایچ کیو میں تقسیم اعزازات کی تقریب میں شرکت کی جہاں افسران اور جوانوں کو ستارۂ امتیاز ملٹری اور تمغۂ بسالت سے نوازا گیا۔
اس موقع پر آرمی چیف جنرل سید عاصم منیر نے کہا کہ شہداء اور غازی ہمارا فخر ہیں، شہداء کی قربانیاں مادرِ وطن کے لیے بے نظیر اور ناقابلِ فراموش ہیں۔
آرمی چیف جنرل سید عاصم منیر نے کہا کہ آج کا امن اور آزادی ان شہداء کی قربانیوں کی مرہون منت ہے۔
علاوہ ازیں آئی ایس پی آر نے جنرل سید عاصم منیر کے اوور سیز پاکستانیوں کے کنونشن سے خطاب کی مزید تفصیلات بھی جاری کردی ہیں۔
آرمی چیف جنرل سید عاصم منیر نے سوشل میڈیا کے غیر ذمہ دارانہ استعمال پر کڑی تنقید کرتے ہوئے کہا کہ قرآن کہتا ہے جب تمہارے پاس کوئی اطلاع آئے تو اچھی طرح تحقیق کرلیا کرو مگر سوشل میڈیا ’’فارورڈڈ ایز رسیوڈ‘‘ ہے یعنی خبر کو بغیر تصدیق آگے بڑھا دیتا ہے۔
ان کا کہنا تھا کہ پاکستان کے سیکیورٹی اداروں میں جو بغاوت کو ہوا دیتا ہے وہ پاکستان کا دشمن ہے، مٹھی بھر دہشت گرد پاکستان کو روشن مستقبل کی جانب بڑھنے سے نہیں روک سکتے۔
آرمی چیف کا کہنا تھا کہ جس ملک کے تمام ادارے آئین و قانون کے مطابق کام کریں ایسی ریاست کو ہارڈ اسٹیٹ کہا جاتا ہے، ہمیں امید نہیں چھوڑنی اور مایوس بھی نہیں ہونا ہے۔
