فرمان الہی
نماز کے اوقات
وزیرِ خارجہ اسحاق ڈار نے کہا ہے کہ پاکستان روانڈا کی مصنوعات کے لیے پُرکشش منڈی ہے اور اس کی ترقی کرتی معیشت میں اہم کردار ادا کر سکتا ہے۔
روانڈا کے وزیرِ خارجہ اپنے دورۂ پاکستان کے دوران وزارتِ خارجہ پہنچے، جہاں نائب وزیرِاعظم و وزیرِ خارجہ اسحاق ڈار نے معزز مہمان کا استقبال کیا۔
روانڈا کے وزیرِ خارجہ کے ہمراہ مشترکہ پریس کانفرنس کرتے ہوئے اسحاق ڈار نے کہا کہ روانڈا کے وزیرِ خارجہ کی پاکستان آمد کا خیر مقدم کرتے ہیں، پاکستان روانڈا کے ساتھ تعلقات کو بہت اہمیت دیتا ہے، دونوں ممالک دو طرفہ تعلقات اور تعاون کو مزید مضبوط بنانے کے لیے پُرعزم ہیں۔
انہوں نے کہا کہ پاکستان ٹیکسٹائل اور چاول سمیت دیگر مصنوعات کی برآمد میں عالمی پہچان رکھتا ہے، مختلف شعبوں میں پاکستان اور روانڈا کے درمیان مضبوط تعاون قائم ہے، دونوں ممالک مختلف عالمی فورمز پر ایک دوسرے کے مؤقف کی حمایت کرتے ہیں۔
روانڈا کے وزیرِ خارجہ اولیورجین پیٹرک ندوہنگرے نے کہا کہ پاکستان کا یہ میرا پہلا دورہ ہے، پاکستانی ہم منصب اسحاق ڈار سے مفید بات چیت ہوئی، اعلیٰ سطح کے تبادلوں سے دو طرفہ تعلقات مزید مضبوط ہوں گے، پاکستان اور روانڈا کے تعلقات باہمی احترام پر مبنی ہیں۔
انہوں نے کہا کہ پاکستان کے ساتھ دو طرفہ تجارت کا حجم بڑھانا چاہتے ہیں، ہم نے ڈپلومیٹک ٹریننگ سے متعلق ایم او یو پر دستخط کیے ہیں، ہم دیگر ایم او یوز پر دستخط کرنے کا بھی سوچ رہے ہیں، چاہتے ہیں کہ پاکستانی کاروباری شخصیات روانڈا میں بزنس کریں۔
ان کا کہنا ہے کہ ہمارے تعلقات باہمی احترام پر مبنی ہیں، روانڈا پاکستان کو 26 ملین ڈالرز کی برآمدات کرتا ہے، چاہتے ہیں کہ پاکستان کو اعلیٰ کوالٹی کی چائے بھیجیں، عالمی امن کے فروغ کے لیے پاکستان اور روانڈا مل کر کام کرتے ہیں۔
وزیرِ خارجہ روانڈا نے کہا کہ یو این امن مشن کے لیے فوجی دینے میں پاکستان اور روانڈا ٹاپ فائیو ممالک میں ہیں، دونوں ممالک میں کرکٹ کے فینز موجود ہیں، پاکستان ہمیں کرکٹ میں مہارت سکھائے گا۔
