فرمان الہی
نماز کے اوقات
نیپالی کوہ پیما نرمل پُرجا نے دنیا کے خطرناک ترین پہاڑوں میں سے ایک نانگا پربت سر کر کے تاریخ رقم کر دی، وہ دنیا کے پہلے کوہ پیما بن گئے ہیں جنہوں نے 8 ہزار میٹر سے بلند چوٹیاں 50 مرتبہ سر کی ہیں۔
برطانوی شاہی اعزاز ایم بی ای رکھنے والے نرمل پُرجا نے نانگا پربت (8,126 میٹر) پر کامیابی سے سر کرنے کے بعد یہ سنگِ میل عبور کیا، انہوں نے اپنی کامیابی کو زندگی کی سب سے خطرناک مہم قرار دیتے ہوئے کہا کہ دورانِ چڑھائی مجھے شدید ہوا، برفانی تودوں اور پتھروں کے گرنے جیسے خطرات کا سامنا رہا۔
اس شاندار ریکارڈ میں سے 22 چڑھائیاں انہوں نے بغیر اضافی آکسیجن کے مکمل کیں، جو بذاتِ خود ایک نیا عالمی ریکارڈ ہے۔
پُرجا نے اپنی کامیابی کو نیپال اور برطانیہ کے درمیان 200 سالہ دوستانہ تعلقات کے نام کرتے ہوئے دونوں ممالک کے پرچم لہرائے، وہ برطانوی اسپیشل فورسز اور گورکھا رجمنٹ میں بھی خدمات انجام دے چکے ہیں۔
نرمل پُرجا پہلی بار 2019ء میں پروجیکٹ پاسیبل کے تحت عالمی شہرت کی بلندیوں پر پہنچے، انہوں نے صرف 6 ماہ اور 6 دن میں دنیا کی تمام 14 آٹھ ہزار میٹر بلند چوٹیوں کو سر کر لیا، اس ریکارڈ کو بعدازاں نیٹ فلکس کی ڈاکیومنٹری Peaks: Nothing Is Impossible میں دکھایا گیا۔
