فرمان الہی
نماز کے اوقات
پاکستانی اداکارہ اور نوجوان کاروباری شخصیت کومل عزیز خان نے شوبز انڈسٹری سے کنارا کشی اختیار کرنے کی وجوہات بیان کردیں۔
حال ہی میں ایک پوڈکاسٹ میں گفتگو کرتے ہوئے کومل عزیز نے انکشاف کیا کہ انہوں نے شوبز کو اس لیے خیرباد کہا کیونکہ انڈسٹری کا ماحول اُن کے مطابق تعلیم یافتہ شخص کے لیے موزوں نہیں تھا۔
اداکارہ نے کہا کہ شوبز کے اوقات کار غیر انسانی ہیں، پیسوں کا کوئی مسئلہ نہیں تھا مگر ماحول میرے لیے قابلِ قبول نہیں تھا، ماحول خواتین کے لیے غیر محفوظ تو نہیں لیکن صفائی ستھرائی کا فقدان تھا، واش رومز کی حالت خراب، کھانے پینے کا کوئی مناسب انتظام نہیں اور سب سے بڑھ کر سیاست بہت تلخ اور چھوٹی سطح کی تھی، میں نے اس سیاست سے بچنے کے لیے اپنا کاروبار شروع کیا اور انڈسٹری سے الگ ہوگئی۔
کومل عزیز نے مزید کہا کہ شوبز ایک کمرشل دنیا ہے جہاں زیادہ تر لوگ صرف چمک دمک اور خود نمائی کے لیے آتے ہیں، یہ دنیا زیادہ تر خود پسند افراد کو اپنی طرف کھینچتی ہے، یہاں ایک دوسرے کی تعریفوں پر ہی سب کچھ چلتا ہے، جو میرے لیے ناقابلِ برداشت تھا۔
اداکارہ نے یہ بھی بتایا کہ میں نے بغیر کسی دکھاوے یا ڈرامے کے شوبز چھوڑا، میں نے انسٹاگرام پر جذباتی پوسٹس ڈال کر اعلان نہیں کیا بلکہ خاموشی سے اپنا راستہ بدل لیا۔
کومل عزیز کا کہنا تھا کہ انہیں شوبز کے چند سینئرز کی جانب سے یہ بھی کہا گیا کہ یہ ایک جال ہے، جس میں داخل ہونے کے بعد کوئی نکل نہیں سکتا، تاہم وہ چار سال سے شوبز سے دور ہیں اور واپسی کا کوئی ارادہ نہیں رکھتیں۔
