فرمان الہی
نماز کے اوقات
وفاقی حکومت کا این 25 شاہراہ کے بعد ایک اور منصوبے کے لیے نیا ٹیکس لگانے کا ارادہ ہے۔
ذرائع کے مطابق وفاقی حکومت نے آئی ایم ایف سے اسلام آباد میں ایک نیا ٹیکس لگانے کی اجازت مانگ لی ہے۔ اس حوالے سے میونسپل ٹیکس لگا کر اسلام آباد میں میڈیکل کمپلیکس کی تعمیر مکمل کی جائے گی جس کی لاگت 213 ارب روپے آئے گی۔
ذرائع کا کہنا ہے کہ آئی ایم ایف نے پاکستان کی نئے ٹیکس کی درخواست پر مزید تفصیلات طلب کرلی ہیں، حکومت کو تین سال میں منصوبہ مکمل کرنے میں مالی وسائل میں مشکلات ہیں۔
ذرائع کے مطابق حکومت منصوبے کیلئے ہنگامی فنڈ سے 30 ارب روپے فوری جاری کرنے پر غور کر رہی ہے۔ وزارت خزانہ میڈیکل کمپلیکس منصوبے کو پی ایس ڈی پی کا حصہ بنانا چاہتی ہے۔
ذرائع کا یہ بھی کہنا ہے کہ حکومت 76 ملین ڈالر کے پانڈا بانڈز کے ممکنہ منافع کو بھی منصوبے پر لگانے پر غور کر رہی ہے۔ حکومت نے ابتدائی طور پر منصوبے کیلئے 3.5 ارب روپے فراہم کر رکھے ہیں، یہ رقم جناح میڈیکل کمپلیکس کمپنی کے قیام اور عملے کی بھرتی پر خرچ ہوگی۔
