فرمان الہی
نماز کے اوقات
بانیٔ پی ٹی آئی عمران خان نے جی ایچ کیو حملہ کیس میں ویڈیو لنک کے ذریعے کارروائی کا بائیکاٹ کر دیا۔
راولپنڈی کی انسداد دہشتگردی عدالت میں جی ایچ کیو حملہ کیس کی سماعت ہوئی جس میں عمران خان کو ویڈیو لنک پر عدالت میں پیش کیا گیا تاہم انہوں نے ویڈیو لنک کے ذریعے کارروائی کا بائیکاٹ کر دیا۔
عمران خان کو 3 مرتبہ ویڈیو لنک پر پیشی کے لیے پیغام بھیجا گیا، ساڑھے 10 بجے پہلی بار رابطے پر بتایا گیا کہ وہ 11بجے ویڈیو لنک پر پیش ہوں گے اور 11 بجے رابطہ کرنے پر بتایا گیا کہ بانیٔ پی ٹی آئی پیش ہو رہے ہیں، 11 بج کر 25 منٹ پر رابطہ کرنے پر وہ ویڈیولنک پر پیش ہوئے۔
سماعت کے دوران وکیل صفائی فیصل ملک نے عمران خان سے اکیلے میں بات کرنے کی استدعا کی جس پر عدالت نے ان کی وکیل صفائی سے بات کروائی تاہم بانیٔ پی ٹی آئی نے مقدمہ اور قانونی نکات کی بجائے سیاسی گفتگو شروع کر دی۔
اس موقع پر وکلاء صفائی نے عمران خان کو بتایا کہ ویڈیو لنک نوٹیفکیشن کو ہائی کورٹ میں چیلنج کر رہے ہیں، آپ کی اس نوٹیفکیشن پر کیا ہدایت ہے، اس پر عمران خان نے وکلاء کو عدالتی کارروائی کا بائیکاٹ کرنے کا کہہ دیا۔
عمران خان کی ہدایت کے بعد وکلاء صفائی عدالت سے باہر چلے گئے تاہم عدالت نے سماعت جاری رکھتے ہوئے گواہان کے بیانات ریکارڈ کرنا شروع کر دیے۔
عدالت نے سماعت کے دوران استغاثہ کے 2 گواہان کی شہادت قلمبند کی جس میں سب انسپکٹر سلیم قریشی اور سب انسپکٹر منظور شہزاد نے بیان ریکارڈ کروایا جب کہ دونوں گواہان کی جانب سے ویڈیو کلپس پر مشتمل 5 یو ایس بی عدالت میں پیش کی گئیں۔
عدالت نے عمران خان کی کو ذاتی حیثیت میں پیش کرنےکی درخواست خارج کرتے ہوئے کہاکہ بانی پی ٹی آئی پنجاب حکومت کے نوٹیفکیشن کے مطابق ویڈیو لنک پر ہی پیش ہوں گے۔
عدالت نے آئندہ سماعت 23 ستمبر تک ملتوی کرتے ہوئے ایف آئی اے، پیمرا، پی آئی ڈی، انٹرنل سیکیورٹی اور وزارت داخلہ کے 10 گواہان کو طلب کرلیا۔
