فرمان الہی
نماز کے اوقات
وفاقی وزیر رانا تنویر حسین نے کہا کہ پاکستان اونٹنی کا خشک دودھ تیار کر کے امریکا اور چین کو برآمد کر رہا ہے، سعودی عرب نے بھی خشک دودھ لینے میں دلچسپی ظاہر کی ہے۔
اسلام آباد میں وفاقی وزیرِ فوڈ سیکیورٹی رانا تنویر حسین سے قطر کے سفیر علی بن مبارک الخاطر نے ملاقات کی ہے۔
اعلامیے کے مطابق ملاقات کے دوران پاکستان اور قطر کے درمیان زرعی شعبے میں تعاون بڑھانے پر تبادلۂ خیال کیا گیا۔
اس موقع پر وفاقی وزیرِ فوڈ سیکیورٹی رانا تنویر حسین نے کہا کہ پاکستان اور قطر کے درمیان تعلقات اخوت، احترام اور اعتماد پر مبنی ہیں۔
انہوں نے کہا کہ پاکستان کے پاس حلال گوشت، پھل، سبزیوں، چاول اور چارے کی فراہمی کی زبردست صلاحیت موجود ہے۔
رانا تنویر حسین نے کہا کہ پاکستان اونٹنی کا خشک دودھ تیار کر کے امریکا اور چین کو برآمد کر رہا ہے۔
وفاقی وزیرِ فوڈ سیکیورٹی نے کہا کہ سعودی عرب نے بھی پاکستان سے اونٹنی کا خشک دودھ لینے میں دلچسپی ظاہر کی ہے۔
اعلامیے کے مطابق ملاقات میں زرعی شعبے میں تعاون کے لیے مشترکہ ورکنگ گروپ بنانے کی تجویز پیش کی گئی۔
قطر کے سفیر علی بن مبارک الخاطر نے پاکستان کی زرعی صلاحیت اور تربیت یافتہ افرادی قوت کو سراہا اور کہا کہ قطر کے وزیر تجارت جلد پاکستان کا دورہ کریں گے۔
اعلامیے میں کہا گیا ہے کہ دونوں ممالک نے زرعی تعاون کے لیے مفاہمتی یادداشت پر اتفاق بھی کیا۔
