فرمان الہی
نماز کے اوقات
پاکستان شوبز انڈسٹری کی ابھرتی ہوئی اداکارہ و ماڈل عنزیلہ عباسی نے اپنے والدین کی طلاق اور اس کے بعد والدہ کو پیش آنے والے مسائل پر کھل کر بات کی ہے۔
حال ہی میں اداکارہ و ماڈل نے ساتھی فنکار احمد علی بٹ کے پوڈکاسٹ میں شرکت کی، جہاں انہوں نے مختلف امور پر کھل کر بات کی اور اپنے خیالات کا اظہار کیا۔
انٹرویو کے دوران انہوں نے بتایا کہ جب میرے والدین کی طلاق ہوئی تو ماں (اداکارہ جویریہ عباسی) نے ماں اور باپ دونوں کا کردار نبھایا، وہ اس وقت صرف 20 برس کی تھیں، لیکن انہوں نے مجھے کبھی والد کی کمی محسوس نہیں ہونے دی۔
انہوں نے کہا کہ طلاق کے بعد ماں نے کافی جدوجہد کی، وہ کام کے ساتھ ساتھ گھر بھی سنبھالتیں، ایسا نہیں ہے کہ میں نے بچپن میں کبھی شکایت نہیں کی یا ناراض نہیں ہوئی لیکن جب چیزیں سمجھ آئیں 23 یا 24 برس کی عمر میں تو احساس ہوا کہ انہوں نے میرے لیے بہت کیا ہے، پھر میں نے کبھی ان سے کوئی شکایت نہیں کی۔
اداکارہ نے خود مختاری پر بات کرتے ہوئے کہا کہ میں نے 22 برس کی عمر میں فیصلہ کیا کہ میں گھر سے باہر نکل کر خود کماؤں گی اور خود مختار بنوں گی، اس پر ماں کے ساتھ کافی بحث بھی ہوئی لیکن الگ رہنے کے بعد ان سے تعلقات بہتر ہوگئے، انہوں نے مجھ پر بھروسہ کیا، وہ میرے لیے کھانا لے کر آتیں اور ہم ایک ساتھ اچھا وقت گزارتے تھے۔
عنزیلہ عباسی نے اپنے والد شمعون عباسی کے بارے میں بات کرتے ہوئے کہا کہ میں نے اپنے والدین کا کام اتنا نہیں دیکھا لیکن میں یہ تسلیم کرتی ہوں کہ وہ ایک بہترین اداکار ہیں، مگر مجھے نہیں لگتا کہ میں اس کے علاوہ انہیں کسی بھی پہلو سے سمجھ سکتی ہوں۔
انہوں نے کہا کہ جب میں چھوٹی تھی تو مجھے ان کی طرح بننا تھا، ان کی طرح کام کرنا چاہتی تھی جیسے وہ ملٹی ٹاسکنگ ہیں۔ وہ ایک اداکار، ہدایت کار، پروڈیوسر اور مصنف ہیں تو میں بھی ایسا ہی کرنا چاہتی تھی، ابھی مجھے سب کچھ کرنا ہے لیکن اب میں ان کی طرح نہیں بننا چاہتی۔
انہوں نے کہا کہ اگر میں نے اپنے والد سے کچھ سیکھا ہے تو وہ یہ کہ اپنے ہنر پر کام کرتے رہنا چاہیے، میں جو کچھ بھی کرتی ہوں اس میں خود کو مسلسل بہتر بنانے کی کوشش کر رہی ہوں۔
عنزیلہ عباسی معروف اداکار جویریہ عباسی اور شمعون عباسی کی بیٹی ہیں، جبکہ انہوں نے اگست 2023 میں تاشفین انصاری سے شادی کی۔
