فرمان الہی
نماز کے اوقات
بھارتی شہر نئی دہلی میں خاندانی دشمنی کے نتیجے میں 52 سالہ شخص کو کئی گولیاں مار کر قتل کردیا گیا۔
بھارتی میڈیا کے مطابق مقتول کی شناخت رتن لوہیا کے نام سے ہوئی ہے جس کے جسم سے مجموعی طور پر 69 گولیاں برآمد ہوئی ہیں۔
یہ واقعہ گزشتہ ماہ پیش آیا جب رتن لوہیا صبح سویرے اپنے گھر سے کام کے سلسلے میں نکلا، اسی دوران گھات لگائے ہوئے حملہ آوروں نے اسے گھیر کر اندھا دھند فائرنگ کردی جس کے نتیجے میں وہ موقع پر ہی ہلاک ہوگیا تھا۔
بھارتی میڈیا کا کہنا ہے کہ رتن لوہیا کے گھر کے پاس سے حاصل ہونے والی سی سی ٹی وی فوٹیج کے مطابق تین حملہ آور صبح تقریباً 6 بجے ایک کار میں مقتول کے گھر کے قریب پہنچے تھے۔ کار کی نمبر پلیٹ موجود نہیں تھی۔
مقتول کے اہل خانہ نے الزام لگایا ہے کہ یہ قتل ان کے رشتے دار رامبیر لوہیا نے اپنے بیٹے ارون کی موت کا بدلہ لینے کے لیے کروایا ہے۔
بھارتی میڈیا کے مطابق ارون کے قتل کے معاملے میں رتن لوہیا کے بڑے بیٹے دیپک کو گرفتار کیا گیا تھا۔
مقتول کی بیٹی کا کہنا ہے کہ رامبیر اور اس کے رشتے دار کافی عرصے سے ان کے والد کو دھمکیاں دے رہے تھے جبکہ ان کے والد کی کسی سے ذاتی دشمنی نہیں تھی۔
دوسری جانب مقتول کی بہن کے مطابق یہ خاندانی تنازع دراصل نئی نسل کے درمیان ہونے والی جھڑپ سے شروع ہوا تھا جو بعد میں ایک سنگین دشمنی میں بدل گیا۔
بھارتی میڈیا کا کہنا ہے کہ پولیس اس قتل کو ’کنٹریکٹ کلنگ‘ کے زاویے سے بھی دیکھ رہی ہے کیونکہ تحقیقات میں معلوم ہوا ہے کہ بیرون ملک موجود گینگسٹرز کو رتن لوہیا کے قتل کی ذمہ داری دی گئی تھی۔
