فرمان الہی
نماز کے اوقات
فیفا ورلڈ کپ 2026 کے دوران فرانس کی فٹ بال ٹیم پر تبصرہ بالی ووڈ کے شہنشاہ امیتابھ بچن کو مہنگا پڑ گیا۔
فرانسیسی کھلاڑیوں کی رنگت اور نسل پر کیے گئے ایک ٹوئٹ کے بعد امیتابھ بچن کو عالمی سطح پر شدید تنقید اور عوامی غصے کا سامنا کرنا پڑ رہا ہے۔
سوشل میڈیا پر اس ہنگامے کے بعد اب امیتابھ بچن نے بھی خاموشی توڑتے ہوئے اپنی غلطی کا بالواسطہ اعتراف کر لیا، جس نے اس تنازع کو مزید ہوا دے دی ہے۔
فیفا ورلڈ کپ 2026 میں فرانس کی فٹ بال ٹیم کی پیراگوئے کے خلاف شاندار جیت کے بعد بالی ووڈ کے لیجنڈری اداکار امیتابھ بچن نے سوشل میڈیا پلیٹ فارم ’ایکس‘ (سابقہ ٹوئٹر) پر ایک ایسا تبصرہ کردیا جس نے انٹرنیٹ پر طوفان کھڑا کر دیا۔
امیتابھ بچن نے فرانسیسی ٹیم کی نسلی ساخت پر انگلی اٹھاتے ہوئے اپنے ٹوئٹ میں لکھا، ’ورلڈ کپ 2026 کے دوران میچ میں 11 کھلاڑیوں میں سے فرانسیسی ٹیم کا ایک کھلاڑی سفید فام جبکہ 10 کھلاڑی سیاہ فارم ہیں۔۔ بلیک پاور۔‘
امیتابھ بچن کا یہ ٹوئٹ سوشل میڈیا صارفین کو بالکل پسند نہ آیا اور دنیا بھر کے فٹ بال مداحوں نے اداکار کو آڑے ہاتھوں لیا۔
صارفین کا کہنا تھا کہ کھلاڑیوں کو ان کی جلد کے رنگ یا نسل سے نہیں بلکہ ان کی قومیت اور کارکردگی سے پہچانا جانا چاہیے۔
کئی صارفین نے اس ٹوئٹ کو انتہائی غیر حساس اور غیر ضروری قرار دیتے ہوئے کہا کہ اتنے بڑے عالمی کھیلوں کے ایونٹ میں جہاں نمائندگی اور شناخت کا معاملہ انتہائی نازک ہوتا ہے وہاں امیتابھ بچن جیسے سینئر اداکار کو ایسی رنگ اور نسل پر مبنی باتیں زیب نہیں دیتیں۔
شدید تنقید کی زد میں آنے کے بعد امیتابھ بچن نے اپنے بلاگ پر براہِ راست اس تنازع کا نام لیے بغیر اپنی غلطی کا اعتراف کیا۔
انہوں نے لکھا، ’روزانہ کی زندگی ایک نیا سبق، اور سیکھنے کا عمل ہے۔ اپنی غلطی کا اعتراف کرنا کوئی بری بات نہیں، بلکہ یہ آپ کے کردار کو ظاہر کرتا ہے۔‘
انہوں نے مزید لکھا کہ بعض اوقات کسی بحث اور جھگڑے کو ختم کرنے کا بہترین طریقہ یہ ہوتا ہے کہ آپ سامنے والے سے کہہ دیں، ’ہو سکتا ہے کہ آپ ہی صحیح ہوں!‘
