فرمان الہی
نماز کے اوقات
پاک بحریہ کے جہاز پی این ایس سیف نےتھائی لینڈ کا سفر مکمل کرلیا ہے۔ جہاز نے رائل تھائی نیوی کی طرف سے منعقدہ ’آسیان ‘ کی پچاسویں سالگرہ اور انٹرنیشنل فلیٹ ریویو میں شرکت کی۔
ریئر ایڈمرل ذکا ء الرحمٰن ،فلیگ آفیسر سی ٹریننگ نے پاک بحریہ کے سربراہ کی نمائندگی کی۔پٹایا میں قیام کے دوران فلیگ آفیسر سی ٹریننگ نے رائل تھائی نیوی کے سینئر نیول عہدیداران اور دیگر شخصیات سے ملاقاتیں کیں جن میں رائل تھائی نیوی کے ڈپٹی کمانڈر اِن چیف ایڈمرل لیوچی روڈٹ ، تھائی لینڈ کے وزیر دفاع جنرل پروت وانگسو وان اور ملائشیاء کی بحریہ کے سربراہ ایڈمرل تان سری احمد قمر الزمان بن حاجی احمد بدرالدین شامل تھے۔
فلیگ آفیسر نے آسیان کی پچاسویں سالگرہ پر تھائی حکومتی عہدیداران کو مبارکباد پیش کی اور تھائی لینڈ کی عوام بالخصوص رائل تھائی نیوی کے لئے پاک بحریہ کے سربراہ ایڈمرل ظفر محمود عباسی کی طرف سے نیک خواہشات کا پیغام پہنچایا۔
پٹایا میں پی این ایس سیف کے قیام کے دوران جہاز کے کمانڈنگ آفیسر کیپٹن شہزاد اقبال نے بھی کمانڈر رائل تھائی فلیٹ ایڈمرل،پولیس میجر جنرل آنان شیرون چاسری، شہر کے میئر اور دیگر عسکری عہدیداران سے ملاقاتیں کیں۔
انٹرنیشنل فلیٹ ریویو2017آسیان کی گولڈن جوبلی کے سلسلے کی ایک اہم ترین سرگرمی تھی جس میں مختلف ممالک کی 19بحری افواج کے 36جہازوں نے شرکت کی۔
اس موقع پر 19ممالک کی بحری افواج کے سربراہان اور 15ممالک کی بحری افواج کے سربراہان کے نمائندگان بھی موجود تھے۔
پی این ایس سیف نے رائل تھائی نیوی کے کمانڈر اِن چیف کی دعوت پر پاک بحریہ کی نمائندگی کی۔
اپنے قیام کے دوران پاک بحریہ کے آفیسرز اور سیلرز نے پٹایا کے ساحل پر منعقدہ مختلف سرگرمیوں بشمول سٹی ملٹری پریڈ میں حصہ لیا۔
